छत्रपती शिवाजी महाराज चौकाचे पालटले रूपडे

जुईनगर, ता. ३० (बातमीदार) : सानपाडा सेक्टर १०मधील छत्रपती शिवाजी महाराज चौकाचे सुशोभीकरण करण्यात आले आहे. चौकाचा लोकार्पण सोहळा शनिवारी (ता. २८) रात्री खासदार नरेश म्हस्के यांच्या हस्ते पार पडला. म्हस्के यांच्या हस्ते विद्युत रोषणाई व भगवे ध्वजारोहण करीत हा लोकार्पण सोहळा पार पडला.
पूर्वी केवळ नामफलकाचा चौथरा या चौकात होता. आता नवी मुंबई महापालिका अभियंता विभागातर्फे विलोभनीय सुशोभीकरण करण्यात आले आहे. चौकाला किल्ल्याच्या बुरुजासारखे स्वरूप देण्यात आले आहे. भोवताली मावळ्यांच्या प्रतिकृती उभारण्यात आल्या. मध्यभागी भगवा ध्वज उभारत विद्युत रोषणाई करण्यात आल्याने गडकिल्ल्यांच्या आठवणींना उजाळा मिळाल्याचा भास स्थानिक नागरिकांना होत आहे. याप्रसंगी जिल्हाप्रमुख द्वारकानाथ भोईर, माजी नगरसेवक सोमनाथ वास्कर, माजी नगरसेविका कोमल वास्कर, स्वप्ना गावडे, रतन मांडवे, सानपाडा विभाग पदाधिकारी, महिला आघाडीसह परिसरातील नागरिक उपस्थित होते. कार्यक्रमाचे प्रस्ताविक आणि आभार शिवसेना पदाधिकारी विसाजी लोके यांनी व्यक्त केले.