वीर वाजेकर महाविद्यालयाच्या वतीने वृक्षारोपण

उरण, ता. ३० (वार्ताहर) : रयत शिक्षण संस्थेचे फुंडे येथील वीर वाजेकर कला, विज्ञान आणि वाणिज्य महाविद्यालय व तळोजा येथील केमिशिया फार्मास्युटिकल कंपनीच्या सहकार्याने वृक्षारोपण मोहीम राबवण्यात आली. या अभियानात १३५ वृक्षांचे रोपण करण्यात आले. मधुमालती, करंज, काजू, अर्जुन, बदाम, बहावा, फणस, ताम्हण, वड यांसारख्या लोकोपयोगी व पर्यावरणदृष्ट्या महत्त्वाच्या वृक्षांचे रोपण करण्यात आले. ही सर्व रोपे केमिशिया फार्मास्युटिकल कंपनीने सीएसआर उपक्रमांतर्गत भेट केली होती. तु. ह. वाजेकर विद्यालय (फुंडे), टाकीगाव, बापदेव मंदिराजवळील वनक्षेत्र आणि इतर नैसर्गिक परिसरात ही झाडे लावण्यात आली. या वेळी केमिशिया फार्मास्युटिकलचे संचालक दीपक पवार आणि संतोष शिंदे यांच्यासह १५ कर्मचारी, तसेच वाजेकर महाविद्यालयाचे प्रभारी प्राचार्य डॉ. आमोद ठक्कर, सर्व प्राध्यापक, विद्यार्थी व शिकक्षेतर कर्मचारी उपस्थित होते.