बीड येथे विद्यार्थिनीवरील लैंगिक छळप्रकरणी कठोर कारवाई करा

विद्यार्थिनीच्या छळप्रकरणी कठोर कारवाई करा!

मुंबई, ता. ३० : बीड येथील एका खासगी कोचिंग क्लासमध्ये विद्यार्थिनीवर झालेल्या लैंगिक छळाच्या घटनेप्रकरणी कठोर कारवाई करण्याची मागणी विधान परिषद उपसभापती डॉ. नीलम गोऱ्हे यांनी केली आहे. गोऱ्हे यांनी आज विशेष पोलिस महानिरीक्षक, छत्रपती संभाजीनगर परिक्षेत्र यांना तसे पत्र पाठवले.
शिक्षणासाठी कोचिंग क्लासमध्ये गेलेल्या मुलीवर असे अत्याचार होणे हे कोणत्याही सुसंस्कृत समाजासाठी लज्जास्पद असून, अशा घटनांना वेळीच थांबवणे गरजेचे आहे, असे नीलम गोऱ्हे यांनी म्हटले आहे. या प्रकरणात संबंधित विद्यार्थिनीने धैर्याने पुढे येत पोलिसांकडे तक्रार दिली असून, आरोपीविरुद्ध गुन्हा दाखल झाला आहे. तसेच अशा प्रकरणांमध्ये त्वरित न्यायप्रक्रिया आणि कठोर कायदेशीर कारवाई आवश्यक असल्याचे डॉ. गोऱ्हे यांनी या पत्रात नमूद केले आहे. दरम्यान, पीडित विद्यार्थिनीला मानसिक, कायदेशीर आणि सामाजिक आधार देणे आणि बीड जिल्ह्यातील तसेच इतर खासगी कोचिंग क्लासेसची सुरक्षिततेच्या दृष्टीने तपासणी करण्याची गरज आहे, असेही त्यांनी सांगितले.