बोईसरमध्ये १२ किलो गांजा जप्त

तारापूर (बातमीदार) : स्थानिक गुन्हे शाखेने बोईसरमधील एका चाळीत धाड टाकून जवळपास १२ किलो गांजा जप्त केला आहे. याप्रकरणी एका संशयित आरोपीला अटक करण्यात आली आहे.

पालघरचे पोलिस अधीक्षक यतीश देशमुख यांच्या आदेशानुसार पोलिसांकडून अवैध धंद्यांविरोधात जोरदार कारवाई सुरू आहे. अमली पदार्थ विरोधी कारवाईदरम्यान बोईसरमधील सरावली, धोडीपूजा येथील मयूर धोडी यांच्या चाळीतून गांजाची बेकायदा साठवणूक आणि विक्री केली जात असल्याची गुप्त माहिती स्थानिक गुन्हे शाखेचे प्रभारी अधिकारी प्रदीप पाटील यांना मिळाली होती. त्या आधारे स्थानिक गुन्हे शाखेचे सहाय्यक पोलिस निरीक्षक अनिल व्हटकर, उपनिरीक्षक गोरखनाथ राठोड, कर्मचारी दीपक राऊत, संदीप सूर्यवंशी, संजय धांगडा, विजय ठाकूर, नरेंद्र पाटील, कैलास पाटील, प्रशांत निकम यांच्या पथकाने सोमवारी (ता. १) चाळीमधील घरांची झडती घेतली असता एका खोलीमधून एक लाख २७ हजारांचा १२.७८० किलो गांजा जप्त करण्यात आला. याप्रकरणी पंजू समरा कुजर (वय ३५) याला अटक करण्यात आली आहे. यापूर्वीदेखील याच चाळीतून चार किलो गांजा जप्त करण्यात आला होता.