विनयभंगप्रकरणी चोवीस तासात न्यायालयात दोषारोपपत्र दाखल

विनयभंगप्रकरणी चोवीस तासात न्यायालयात दोषारोपपत्र
सकाळ वृत्तसेवा
ठाणे, ता. १ : क्लासवरून घरी एकटी जाणाऱ्या एका १४ वर्षीय अल्पवयीन मुलीचा विनयभंग किसन नगर परिसरात झाला. याप्रकरणी आरोपी दिनेश विवेक घाग याला वर्तकनगर पोलिसांनी अटक केली. तसेच पीडित मुलीचा व फिर्यादीचा जबाब नोंदवून कारवाई पूर्ण करून सबळ पुराव्यानिशी आरोपीविरोधात २४ तासांच्या आत न्यायालयात दोषारोपपत्र दाखल करण्यात आल्याची माहिती पोलिसांनी दिली.
पीडित मुलगी ही रविवारी (ता. २९) ही सकाळी १० वाजण्याच्या सुमारास क्लासवरून घरी एकटीच येत होती. या वेळी एका अनोळखी व्यक्तीने पीडितेचा एमआरआर रुग्णालय ते शास्त्रीनगर असा कारने पाठलाग केला. तसेच गाडीमध्ये येण्याचा इशारा केला व थोड्या वेळाने निघून गेला. हा प्रकार पीडित मुलीने आईला सांगितला. त्यानंतर पीडितेच्या आईने वर्तकनगर पोलिस ठाण्यात धाव घेत गुन्हा दाखल केला. या गुन्ह्याचे गांभीर्य लक्षात घेऊन वरिष्ठ पोलिस निरीक्षक राजकुमार वाघचवरे यांनी दिलेल्या सूचनांप्रमाणे गुन्हे प्रकटीकरण पथकाचे पोलिस उपनिरीक्षक विठ्ठल चिंतामण व तपास पथक यांनी घटनास्थळावरील व परिसरातील सीसीटीव्ही फुटेजची बारकाईने पाहणी करून गुन्ह्यातील गाडीचा शोध घेत त्याचा नंबर प्राप्त केला.
आरोपी हा ठाण्यातील किसन नगर नं. तीन या भागात राहात असल्याचे समजले. त्या भागात शोध घेत असता तो बाहेर असल्याचे समजले. त्याचा मोबाईल नंबर प्राप्त करून तांत्रिक पद्धतीने शोध घेतला. या वेळी कल्याण खडकपाडा येथील एका बारमधून पळून जाण्याच्या तयारीत असताना दिनेश घाग याला अटक केली.
ही कारवाई वागळे परिमंडळ पाचचे उपायुक्त प्रशांत कदम, साहाय्यक पोलिस आयुक्त (वर्तकनगर विभाग) मंदार जवळे यांच्या मार्गदर्शनाखाली वर्तकनगर पोलिस ठाण्याचे वरिष्ठ पोलिस निरीक्षक राजकुमार वाघचवरे, पोलिस निरीक्षक (गुन्हे) मल्हारी कोकरे, सहाय्यक पोलिस निरीक्षक दिलीपकुमार वेडे, पोलिस उपनिरीक्षक विठ्ठल चिंतामण, पोलिस हवालदार जाधव, राठोड, झेमने, कांडेलकर, पोलिस नाईक पाटोळे, पोलिस शिपाई सौदागरे, नागरे कात्राबाद यांनी केली आहे.