महात्मा फुले महाविद्यालयासमोरील सेवारस्ता धोकादायक

महात्मा फुले महाविद्यालयासमोरील सेवा रस्ता धोकादायक
कामोठे, ता. २ (बातमीदार) : महात्मा फुले कला, विज्ञान व वाणिज्य महाविद्यालयाच्या समोरील उड्डाणपुलाखालील सेवा रस्‍त्‍यावरील वाहतूक धोकादायक झाली आहे. चिंचपाडा येथील जनहित सामाजिक संस्थेने राष्ट्रीय महामार्ग प्राधिकरणाच्या व्यवस्थापकांना अपघात टाळण्यासाठी उपाययोजना करण्यासाठी निवेदन दिले आहे.
महात्मा फुले कला, विज्ञान व वाणिज्य महाविद्यालयासमोरून जाणाऱ्या राष्ट्रीय महामार्गावरील उड्डाणपुलाखालील सेवा रस्‍त्‍यावरून दररोज मोठ्या संख्येने जड व अवजड वाहनांची वाहतूक सुरू असते. करंजाडे नोड, वडघर नोड आणि चिंचपाडा परिसरातील नागरिक याच मार्गाने प्रवास करतात. महामार्गाच्या सेवा रस्त्याच्या उड्डाणपुलाखाली दरवर्षी पावसाळ्यात मोठ्या प्रमाणात पाणी जमा होते. या पाण्यामुळे वाहनचालकांना व पादचाऱ्यांना त्रास सहन करावा लागत आहे. त्यातच सेवामार्गाच्या दोन्ही बाजूंनी जड-अवजड वाहनांची भरधाव वाहतूक सुरू असते. शिवाय या रस्त्यावर गतिरोधक नसल्याने भरधाव वाहनांमुळे अपघाताची भीती व्‍यक्‍त केली जात आहे. त्‍यामुळे अपघात टाळण्यासाठी उपाययोजना करण्याची मागणी जनहित सामाजिक संस्थेच्या प्रतिनिधींकडून करण्यात येत आहे.