बौद्ध समाज समन्वय समितीतर्फे ''भिमरत्न'' पुरस्कार देऊन सन्मान

बौद्ध समाज समन्वय समितीतर्फे भीमरत्न पुरस्कार देऊन सन्मान
माणगाव, ता. ३ (वार्ताहर) ः माणगाव तालुका बौद्ध समाज समन्वय समिती इयत्ता १०वी, १२वी तसेच पदविका, पदवी उत्तीर्ण विद्यार्थ्यांचा गुणगौरव व सेवानिवृत्त कर्मचाऱ्यांना भीमरत्न पुरस्कार देऊन सन्मानित करण्यात आले. या वेळी राजमाता जिजाऊ, सावित्रीबाई फुले, डॉ. बाबासाहेब आंबेडकर यांच्या प्रतिमांला पुष्पहार अर्पण करून त्रिशरण पंचशील घेऊन हा कार्यक्रम सुरू करण्यात आला. या वेळी माणगाव तालुक्यातील बौद्ध समाजाचे पदाधिकारी, सामाजिक कार्यकर्ते, विद्यार्थीवर्ग, उपासक, उपासिका मोठ्या संख्येने उपस्थित होते. १०वी, १२वी तसेच पदविका आणि पदवी उत्तीर्ण विद्यार्थ्यांना एक फाइल, सन्मानचिन्ह, तर सेवानिवृत्त कर्मचारी, विशेष पाहुण्यांना भीमरत्न पुरस्कार देऊन त्यांचा गौरव करण्यात आला. या वेळी माणगाव तालुका बौद्धसमाज समन्वय समिती अध्यक्षांनी सांगितले, की कोकण रेल्वेवरील वीर स्‍थानकाला विश्वरत्न डॉ. बाबासाहेब आंबेडकर यांचे नाव देण्यात यावे, शिवाय वीर व माणगाव रेल्वेस्‍थानक येथे डॉ. बाबासाहेब आंबेडकर यांचे तैलचित्र लावण्यासंदर्भात सरकारला निवेदन देण्यात येणार असल्याचे सांगितले. माणगावमध्ये विश्वरत्न डॉ. बाबासाहेब आंबेडकर व बहुजन प्रतिपालक राजे छत्रपती शिवाजी महाराज यांचे पूर्णकृती पुतळे आम्ही बसविल्याशिवाय गप्प बसणार नाही, अशी त्यांनी घोषणा या वेळी केली. या कार्यक्रमाला उद्योजक नरेश अहिरे, बहुजन हितकारिणी सभेचे अध्यक्ष रवींद्र जाधव, बाजार समिती सभापती नाडकर, कोषाध्यक्ष सूर्यकांत कासे, सचिव ॲड. राकेश मोरे यांच्यासह कोषाध्यक्ष संतोष कासारे, उपाध्यक्ष अमोल मोहिते, समन्वय समितीचे पदाधिकारी तसेच विद्यार्थी, पालक मोठ्या संख्येने उपस्थित होते.