शाळा बाह्य बालकांचा घेणार शोध

शाळा बाह्य बालकांचा घेणार शोध
१ जुलै ते १५ जुलै या कालावधीत राबविणार मोहीम
सकाळ वृत्तसेवा
ठाणे, ता. ३ : जिल्ह्यातील ग्रामीण भागासह शहरी भागातील वीटभट्टीवर मजुरीसाठी स्थलांतरीत होणाऱ्या कुटुंबियांतील यासह विविध कारणांनी शिक्षांपासून वंचित राहिलेल्या बालकांचा शोध घेऊन त्यांना शिक्षणाच्या मूळ प्रवाहात आणण्यासाठी शाळाबाह्य मुलांसाठी शोध मोहीम राबविण्यात येणार आहे. ही मोहीम १ जुलै ते १५ जुलै या कालावधीत राबविण्यात येणार आहे. त्या संदर्भातील बैठक जिल्हाधिकाऱ्यांच्या अध्यक्षतेखाली पार पडली असून त्यांनी संबंधी विभागांना निर्देश दिले आहेत.
केंद्र आणि राज्यशासन नियमित शिक्षणाकडे लक्ष वेधले असून बालके शाळाबाह्य होऊ नयेत यासाठी प्रयत्नशील आहे. जिल्ह्याच्या ग्रामीण भागात रोजगारासाठी जिल्ह्यातून हंगामी वास्तव्यास कुटूंबाच्या कुटूंबे येत असतात. या कुटूबांमध्ये शाळकरी मुलांचा मोठ्या प्रमाणत समावेश असतो. मात्र, या स्थलांतरामुळे कुटूंबातील मुलांना शिक्षणापासून वंचित राहवे लागते. यामध्ये ६ ते १४ वयोगटातील प्रत्येक बालकास शाळेच्या पटावर नोंदविले जाणे, बालकांनी नियमित शाळेत येणे आणि त्याला दर्जेदार शिक्षण मिळणे हा हक्क प्राप्त झाला आहे. शाळेत कधीही दाखल न झालेली तसेच शाळेत जाणारी बालके, ज्यांनी शाळेत प्रवेश घेतलेला नाही किंवा ज्या बालकांनी प्रवेश घेऊन प्राथमिक शिक्षण पूर्ण केलेले नसेल अशा ६ ते १४ वयोगटातील बालके एक महिन्यापेक्षा अधिक काळ सातत्याने अनुपस्थित राहत असतील तर असे शाळाबाह्य बालक असल्याचे दिसून येत असते. याची दखल घेत, शासनाच्या माध्यमातून शाळाबाह्य मुलांचा शोध घेण्यासाठी व त्यांना शिक्षणाच्या मूळ प्रवाहात आणण्यासाठी मोहीम हाती घेण्यात आली आहे. ही मोहीम १ जुलै ते १५ जुलै या कालावधीत राबविण्यात येणार आहे. ही मोहीम जिल्ह्यातील सहा महापलिका आणि पाच तालुक्यात राबविण्यात येणार आहे. या संदर्भातील एक बैठक नुकतीच जिल्हाधिकाऱ्यांच्या अध्यक्षतेखाली पार पडली. या बैठकीत त्यांनी संबंधित विभागाला निर्देश दिले.

शाळाबाह्य बालकांमध्ये मुलांचे प्रमाण अधिक
ठाणे जिल्ह्यातील विविध भागात शाळाबाह्य मुलांचा शोध घेण्याची मोहीम मागील वर्षी राबविण्यात आली. या मोहिमेत ५७८ शाळाबाह्य मुले आढळून आली. यामध्ये शाळाबाह्य बालकांमध्ये मुलांचे प्रमाण अधिक आहे. यामध्ये सर्वाधिक ३२१ मुलांचा तर, २५७ मुलींचा समावेश आहे. या सर्व बालकांना शाळेत प्रवेश देऊन शिक्षणाच्या प्रवाहात आणण्यात आले असल्याची माहिती सुत्रांनी दिली.