पुरात अडकलेल्या एकाला वाचवण्यात यश

पुरात अडकलेल्या नागरिकाला वाचवण्यात यश
विक्रमगड, ता. ४ (बातमीदार) : देहरजे नदीवरील पूल पार करताना पांडुरंग मेरे (रा. हातणे) पुराच्या पाण्यात अडकले होते. या वेळी स्थानिक प्रशासन व ग्रामस्थांच्या मदतीने त्यांना सुखरूप बाहेर काढण्यात यश आले.
पांडुरंग मेरे शुक्रवारी (ता. ४) सकाळी साडेनऊच्या सुमारास देहरजे गावातून शिळकडे जात होते. त्या वेळी देहरजे नदीवरील पूल पार करताना पाण्याचा अंदाज न आल्याने तसेच अचानक नदीच्या पाण्याच्या पातळीत वाढ झाल्याने मेरे पुलाच्या मधोमध अडकले होते. याबाबतची माहिती मिळताच विक्रमगड तहसीलदार मयूर चव्हाण व प्रशासन आणि शिळ, देहरजे गावातील नागरिकांनी घटनास्थळी धाव घेत दोराच्या सहाय्याने त्यांना पाण्याच्या प्रवाहातून सुरक्षित बाहेर काढले.