वृद्धाची उड्डाणपुलावरून नाल्यात उडी

बदलापूर, ता. ५ (बातमीदार) : बदलापूर पूर्व व पश्चिमेला जोडणाऱ्या स्वातंत्र्यवीर सावरकर उड्डाणपुलाखालून वाहणाऱ्या नाल्यात एका ज्येष्ठ नागरिकाने उडी मारल्याची धक्कादायक घटना घडली आहे. या व्यक्तीचे नाव अद्याप कळू शकलेले नाही. या व्यक्तीच्या मृतदेहासंदर्भातील प्राथमिक माहिती अजूनही समोर आलेली नाही. काही दिवसांपूर्वी सकाळी साडेआठच्या सुमारास एक वयोवृद्ध व्यक्ती या नाल्याच्या कठड्याजवळ उभी राहून अनेक विचार करत असल्याचे तेथे असलेल्या सीसीटीव्हीत निदर्शनास आले. या सीसीटीव्हीत ती व्यक्ती तेथे दोन-तीन फेरफटका मारताना अचानक वाहत्या पाण्यात उडी मारल्याचे दिसले. यावेळी ही घटना कोणाच्याही लक्षात आलेली नाही. घटनेचे सीसीटीव्ही समोर आल्यानंतर हा प्रकार उघडकीस आला आहे. यासंदर्भात बदलापूर पश्चिम पोलिस ठाण्यात आत्महत्येचा गुन्हा नोंद करण्यात आल्याची माहिती पोलिसांकडून देण्यात आली आहे.