रब्बीतील पिकांचे पावसाने नुकसान

टोकावडे, ता. ५ (बातमीदार)ः मुरबाड तालुक्यात रब्बी हंगाम अवकाळी पावसामुळे भातपिकांचे मोठ्या प्रमाणात नुकसान झाले आहे. याच पार्श्वभूमीवर सामाजिक कार्यकर्ते प्रकाश पवार यांनी मुरबाड तहसीलदार व तालुका कृषी अधिकारी यांच्याकडे तत्काळ पंचनामे करून प्रतिहेक्टर एक लाखाची नुकसानभरपाई द्यावी, अशी मागणी केली आहे.
तालुक्यात वादळवाऱ्यासह पडणाऱ्या मुसळधार पावसामुळे अनेक शेतकऱ्यांचे पीक शेतातच वाया गेले आहे. विशेषतः बळेगाव ग्रामपंचायत हद्दीतील रांजणगाव (नावडीचापाडा) व बळेगाव येथील अनेक शेतकऱ्यांचे भातपीक उद्ध्वस्त झाले असून, कापणी करण्याची संधीही मिळालेली नाही. त्यामुळे जिल्हा परिषद ठाण्याचे माजी उपाध्यक्ष सुभाष पवार यांनी शेतकऱ्यांना नुकसानभरपाई मिळावी, यासाठी तहसीलदार अभिजित देशमुख यांच्याशी दूरध्वनीवरून संपर्क साधून नुकसानभरपाईसंदर्भात पाठपुरावा केला आहे. तसेच अवकाळी पावसामुळे आर्थिक संकट असल्याने सरकारने तातडीने हस्तक्षेप करताना शेतकऱ्यांना मदत करण्याचे आवाहन केले आहे.