बनावट देयक दाखवून भ्रष्टाचार

वाडा, ता. ५ (बातमीदार) : पिक-शिलोत्तर ग्रुप ग्रामपंचायतीमध्ये बनावट देयक दाखवून भ्रष्टाचार झाल्याची तक्रार ग्रामपंचायत सदस्यांनी जिल्हा परिषदेच्या मुख्य कार्यकारी अधिकारी, जिल्हाधिकारी यांच्याकडे केली आहे. जानेवारीमध्ये सहा सदस्यांनी निवेदन देऊन मनमानी कारभार केल्याची तक्रार केली होती, मात्र त्याबाबत काहीही कारवाई न झाल्याने पुरावे देऊन आंदोलनाचा इशाराच त्यांनी दिला आहे.

पिक-शिलोत्तर ग्रुप ग्रामपंचायतीच्या आठपैकी सहा सदस्यांनी दिलेल्या निवेदनामधे सरपंचांवर भ्रष्टाचाराचे आरोप केले आहेत. अन्य सदस्यांना विचारात न घेता खर्च केला जातो व बनावट बिल लावून पैसे हडप केले जातात. त्यांच्या तीन वर्षांच्या कारभाराची त्रयस्थ यंत्रणेमार्फत चौकशी करावी, अशी मागणी निवेदनामध्ये केली आहे. ग्रुप ग्रामपंचायतीचे लेखापरीक्षण करणार्या लेखा परीक्षकाचीही चाैकशी करण्याची मागणी केली आहे. या ग्रामपंचायतीमधे झेरॉक्स व स्टेशनरीची बिले ३८,२०० रुपयांची दाखवली आहेत. ग्रामपंचायतीमधे एकूण कुटुंबसंख्या ६७० असताना एकूण दोन लाख ६५ हजारांची टीसीएल खरेदी केल्याचे दाखवले आहे.

यापूर्वीही कारवाईचे आदेश
वाडा तालुक्यातील सापरोंडे-मांगाठणे ग्रामपंचायतीच्या सरपंचाला लाच घेताना रंगेहाथ पकडल्याचे प्रकरण गाजले होते, तर नुकतेच कुयलू-तोरणे सरपंचाला बडतर्फ केल्याचे प्रकरण चर्चेत असतानाच पिक-शिलोत्तर ग्रामपंचायतीमधील भ्रष्टाचार सदस्यांनीच उघड केल्याने खळबळ माजली आहे. याआधी तत्कालीन जिल्हाधिकारी गोविंद बोडके यांनी सरपंच रवींद्र जोगवला यांच्यावर एका प्रकरणात कारवाईचे आदेश दिले होते, मात्र त्यांची बदली झाल्याने कारवाई झाली नव्हती.

नियमानुसार विकासकामे
सरपंच रवींद्र जोगवाला यांच्याशी संपर्क साधला असता त्यांनी आरोपांचे खंडन केले आहे. ग्रामपंचायतीत केलेली विकासकामे ही कायदेशीर व नियमानुसारच केली आहेत. सदस्यांनी केलेले आरोप हे चुकीचे व बिनबुडाचे आहेत. चौकशीला तयार आहे.