ग्यानबा तुकारामाचा किन्हवलीत गजर

किन्हवली, ता.५(बातमीदार)ः आषाढी एकादशीच्या निमित्ताने महाराष्ट्राच्या कानाकोपऱ्यातील वारकरी विठूरायाच्या दर्शनासाठी पंढरपूरकडे निघाले आहेत. याच पार्श्वभूमीवर शनिवारी (ता. ५) किन्हवली गावात लहानग्यांनी वारकऱ्यांच्या वेशात वृक्षदिंडी काढली.
किन्हवलीतील आदर्श विद्यामंदिर व पी.एस.धानके इंग्लिश मिडीयम स्कूल यांनी ओखोरे व परिधी आगिवले यांच्या रुपाने साक्षात बालरुपातील विठ्ठल-रुक्मिणी प्रकट झाल्याचे पहावयास मिळाले. आदर्श विद्यामंदिरच्या प्रांगणात ‘ग्यानबा तुकारामचा गजर’ करत शेकडो विद्यार्थ्यांनी गोल रिंगण केले. आदर्श विद्यामंदिरपासून सुरु झालेली ही दिंडी शहापूर-मुरबाड रस्त्यावरुन बसस्थानक, हनुमाननगर, छ. शिवाजी मार्केट, शिवमंदिर, ग्रामपंचायत कार्यालय, शहा विद्यालय मार्गे पुन्हा मैदानावर पोहोचली. यावेळी वृक्षारोपणाच्या घोषणा देवून विद्यार्थ्यांनी नागरिकांना झाडे लावण्याचे आवाहन केले. या दिंडीसोबत सेल्फी काढून विद्यार्थ्यांचे कौतुक केले. या वृक्षदिंडीत पार्वती शंकर शिक्षण संस्थेचे संस्थापक अध्यक्ष विष्णू धानके, आदर्शच्या मुख्याध्यापिका सुजाता धानके तसेच वारकरी वेशातील ५०० हून अधिक विद्यार्थी, शिक्षक सहभागी झाले होते.