वसईमध्ये आज माउलींची दिंडी

विरार, ता. ५ (बातमीदार) : डोक्यावर तुळशी वृंदावन, मुखी माउलीचे नाव घेत उद्या (ता. ६) महिला आणि वारकरी वेशातील नागरिक, साहित्यिक वसईकरांचे दिंडीच्या माध्यमातून लक्ष वेधून घेणार आहेत. आषाढी एकादशीच्या निमित्ताने साहित्य जल्लोष प्रतिष्ठा आणि यंगस्टार ट्रस्ट ‘आषाढ घन सावळा’ या अभंगवाणीचे आयोजन करण्यात आले आहे. या कार्यक्रमाचे माध्यम प्रायोजक ‘सकाळ’चे ‘तनिष्का’ व्यासपीठ आहे.

आषाढी एकादशीनिमित्त ‘आषाढ घन सावळा’ या कार्यक्रमात आज आपल्या वेगवेगळ्या संतांचे अभंग सादर करण्यात येणार आहेत. तत्पूर्वी सायंकाळी ४ वाजता विठ्ठल नामाचा गजर करत वसईतील गुजराती शाळेजवळील विठ्ठल-रखुमाई मंदिरातून वारकरी दिंडी आणि पालखी निघणार आहे. ती क्रीडा भवन येथे पोहोचल्यानंतर सायंकाळी साडेपाच वाजता क्रीडा भवनच्या आप्पा पेठे सभागृहात ‘आषाढ घन सावळा’ हा अभंगवाणीचा कार्यक्रम सादर होणार आहे. या कार्यक्रमात ‘सारेगम’ फेम अभिषेक मारोतकर, सारेगम’ आणि ‘सूर नवा ध्यास नवा’ विजेता अनिरुद्ध जोशी, केतकी भावे-जोशी, आरजे अमित काकडे, लिटिल स्टार स्वानंदी केळवेकर आणि निर्माता-दिग्दर्शक योगेश केळवेकर सहभागी होणार आहेत. त्याचबरोबर दिंडीत बाल समाजोन्नती भजन मंडळ, किरवली व मोरया महिला भजन मंडळ, उमेळे हे सहभागी होणार आहेत. या वारकरी दिंडीत नागरिकांनी पारंपरिक वेशभूषेत सहभागी व्हावे, असे आवाहन आयोजकांतर्फे करण्यात आले आहे.