दोन दिवसात ५ घरफोड्या

खारघर, सीबीडीमध्ये चोरट्यांचा धुमाकूळ
दोन दिवसांत पाच घरफोड्या, तब्बल २८ लाखांच्या ऐवजाची चोरी

नवी मुंबई, ता. ६ (वार्ताहर) : घरफोड्या करणाऱ्या चोरट्यांनी सध्या खारघर, बेलापूरमध्ये धुमाकूळ घातला आहे. दोन दिवसांत पाच घरफोड्या करून तब्बल २८ लाखांचा ऐवज लंपास केल्‍याचे उघडकीस आले आहे. पोलिसांनी याप्रकरणी गुन्हा दाखल केला आहे.
खारघर सेक्टर १६ मधील वास्तूविहार संस्कृती सोसायटीमध्ये चोरट्यांनी शुक्रवारी (ता. ४) पहाटे एकाच वेळी तीन घरे फोडली. त्यापैकी अतुल पालोदकर यांच्या घरातून रोख रक्कम व दागिने असा १७ लाख ८० हजार रुपये किमतीचा ऐवज चोरला. पालोदकर कुटुंबीय आईच्या वर्षश्राद्धासाठी गावी गेले असताना, चोरट्यांनी संधी साधून घरफोडी केली. दरम्यान, चोरट्यांनी त्याच इमारतीतील प्रणिती हिंदळेकर, रॉजर डव्हीड मेल यांच्यादेखील घरातूनही चोरी करून किमती ऐवज लंपास केला. खारघर पोलिस ठाण्यात याप्रकरणी गुन्हा दाखल करण्यात आला आहे.
सीबीडी सेक्टर ८ बी मधील कल्पतरू सोसायटीतील रहिवासी व्यावसायिक प्रकाश ढापरे यांचे वडील आजारी असल्याने त्यांना भेटण्यासाठी ते मूळ गावी कुटुंबासह गेले होते. यादरम्यान त्यांचे घर बंद असल्याची संधी साधून चोरट्यांनी गुरुवारी (ता. ३) भरदिवसा त्यांच्या घराचे कुलूप तोडून रोख रक्कम व दागिने असा १० लाखांचा ऐवज लंपास केला. चोरट्यांनी ढापरे यांच्या शेजारी राहणारे भरत पाटील यांच्या घराचे लॉक तोडून सुमारे ५० हजार रुपये किमतीचे देवाचे चांदीचे दागिने पळवले. सीबीडी पोलिस ठाण्यात घरफोडीचा गुन्हा दाखल करण्यात आला आहे.