विठूरायाच्या गजरात दुमदुमली धाकटी पंढरी

विठूरायाच्या गजरात दुमदुमली धाकटी पंढरी
साजगावातील विठ्ठल मंदिरात भक्तांचा महापूर

खोपोली, ता. ६ (बातमीदार) ः रायगडसह कोकणातील प्रतिपंढरपूर म्हणून ओळखल्या जाणाऱ्या धाकटी पंढरी साजगाव-ताकई येथील विठ्ठल-रुक्मिणी मंदिरात आषाढीनिमित्त वारकरी, भक्तांची मांदियाळी होती. यंदा महापूजेचा मान खोपोलीतील उद्योजक माजी उपनगराध्यक्ष कुलदीपक शेंडे व त्‍यांच्या कुटुंबीयांना मिळाला. त्यांच्या हस्ते पहाटे चार ते पाचदरम्‍यान महापूजा झाल्‍यावर सर्वसामान्य भाविकांसाठी मंदिल खुले करण्यात आले.
दिवसभर खोपोली, खालापूर, पनवेल, अलिबाग, पेण, सुधागड तालुक्यासह जिल्ह्यातून भाविकांनी दर्शनासाठी गर्दी केली होती. विठूरायाच्या गजरात धाकटी पंढरी दुमदुमली होती. खोपोलीतील विविध सामाजिक संस्था, वारकरी व ज्‍येष्ठ नागरिकांची पायी दिंडीसह खोपोली व गावागावांतून अन्य पायी दिंड्या विठ्ठलाच्या दर्शनासाठी धाकटी पंढरीत दाखल झाल्या होत्या.
सामाजिक कार्यकर्ते व संस्थांकडून भाविकांसाठी मोफत फराळ व चहाची व्यवस्था करण्यात आली होती. कोणतीही अनुचित घटना घडू नये, वाहतूक कोंडी होऊ नये, यासाठी पोलिस प्रशासनाने चोख बंदोबस्त ठेवला होता.

आषाढी एकादशीनिमित्त येणाऱ्या भाविकांची गैरसोय होऊ नये, यासाठी देवस्थान समितीने उत्तम व्यवस्था केल्‍याचे विठोबा देवस्‍थान समितीचे अध्यक्ष ए. जी. पाटील यांनी सांगितले. खोपोलीसह संपूर्ण खालापूर तालुक्यातील जनतेवर विठ्ठलाची कृपा व्हावी, त्‍यांना सुदृढ आरोग्य लाभावे, कामगार, बळीराजा सुखी आणि समाधानी व्हावा, असे साकडे माजी उपनगराध्यक्ष कुलदीपक शेंडे यांनी विठूचरणी घातले.

मंदिर परिसराला यात्रेचे स्‍वरूप
संतश्रेष्ठ जगद्‌गुरू तुकाराम महाराजांच्या पदस्पर्शाने पावन झालेल्या साजगाव-ताकई येथील बोंबल्या विठोबाच्या मंदिरात आषाढी एकादशीनिमित्त दरवर्षी मोठा सोहळा आयोजित केला जातो. यंदा खोपोली शहरातील ज्येष्ठ नागरिक, हास्य क्लबच्या वतीने पायी दिंडी आली होती. दिवसभर हरिनामाचा गजर, भजन, कीर्तनाचे कार्यक्रम मंदिर सभामंडपात सुरू होते. हार, पूजा साहित्‍य आणि मिठाईच्या दुकानांमुळे परिसराला यात्रेचे स्वरूप आले होते.

खोपोली ः धाकटी पंढरीत विठ्ठलाच्या महापूजेचा मान कुलदीपक शेंडे यांना मिळाला.