मैदानावर फुटबॉलच्या रोमांचक लढती

टोकावडे, ता. ६ (बातमीदार)ः ६४वी सुब्रतो कप आंतरराष्ट्रीय सब ज्युनियर व ज्युनियर ठाणे जिल्हास्तरीय फुटबॉल स्पर्धा मुरबाड तालुक्यातील तळवली येथील महाराष्ट्र मिलिटरी स्कूल येथे भरवण्यात आली होती. या स्पर्धेत ठाणे जिल्ह्यातील ६१ शाळांनी सहभाग नोंदवला होता.
ठाणे जिल्हा क्रीडा अधिकारी कार्यालयामार्फत बुधवार (ता. २) ते शुक्रवार (ता. ४) या कालावधीत ही स्पर्धा उत्साहात पार पडली. स्पर्धेचे उद्घाटन महाराष्ट्र मिलिटरी स्कूलच्या प्राचार्या किशोरी काशिनाथ भोईर यांच्या हस्ते झाले. विविध वयोगटांतील मुलांच्या सामन्यांतून युवा खेळाडूंचा जोश तसेच कौशल्य पाहण्याची संधी मिळाली. स्पर्धेदरम्यान जिल्हा क्रीडा अधिकारी सुवर्णा बारटक्के आणि तालुका क्रीडा अधिकारी सायली जाधव उपस्थित होत्या, तर क्रीडा कार्यकारी अधिकारी धर्मेंद्र यादव यांनी मैदानावर उपस्थित राहत खेळाडूंना प्रोत्साहन दिले.
-------------------------------------------
संघभावनेचे दर्शन
मुरबाड तालुका क्रीडा केंद्राचे प्रमुख दीपक थोरात, स्पर्धाप्रमुख क्रीडा अधिकारी सिद्धार्थ वाघमारे यांनी स्पर्धा यशस्वी करण्यात भूमिका बजावली. महाराष्ट्र मिलिटरी स्कूल तळवली येथील शिक्षक व कर्मचाऱ्यांनीही विशेष परिश्रम घेतले. तीन दिवसांच्या स्पर्धेतून खेळाडूंमध्ये संघभावना, नेतृत्वगुण, क्रीडासंस्कारांचे दर्शन घडले. तसेच सहभागी संघांना राज्यस्तरीय स्पर्धेत खेळण्याची संधी मिळणार आहे.