आधुनिक शेतीचे शहापूरमध्ये धडे

शहापूर, ता. ७ (वार्ताहर) : शहापूर तालुक्यातील अल्याणी, गेगाव गावात ठाणे जिल्हा परिषदेच्या वतीने शेतकऱ्यांसाठी आधुनिक शेतीचे माहितीपर उपक्रम राबवण्यात आले. या वेळी पट्टा पद्धतीने भातलागवडीची प्रात्यक्षिके करण्यात आली, तर मशीनद्वारे भातलागवडीचे प्रात्यक्षिके दाखवली गेली. शेतकऱ्यांनी पारंपरिक भातलागवडीच्या तुलनेत पट्टा पद्धत व यांत्रिकी पद्धतीने लागवड केल्यास होणारा खर्च, मिळणाऱ्या उत्पन्नाचा ताळमेळ बसावा यासाठीचे मार्गदर्शन मुख्य कार्यकारी अधिकारी रोहन घुगे यांनी केले. शाश्वत शेतीसाठी आधुनिक पद्धतींचा अवलंब त्यांनी स्पष्ट केला तसेच जिपसेस योजनेअंतर्गत अर्थात डीबीटीद्वारे शेतकऱ्यांना वाटप केलेल्या कृषी साहित्याची पाहणी केली. या वेळी शेतकऱ्यांशी संवाद साधताना साहित्याचा योग्य वापर कसा करावा, याबाबत सल्ला देण्यात आला.
-------------------------------------------------
महिला बचत गटांना मार्गदर्शन
शेतकऱ्यांनी भविष्यात तूरलागवडीचे क्षेत्र वाढवावे, यासाठी प्रयत्नशील राहावे, असे आवाहन केले. यासोबतच भात व भाजीपाला उत्पादनानंतर त्याच्या विपणनासाठी शेतकरी गट कंपनी स्थापनेचे महत्त्व पटवून देण्यात आले. शेतमालाच्या विक्रीतून शेतकऱ्यांना आर्थिक फायदा कसा करून देऊ शकते, याबाबत शेतकऱ्यांना समजावून सांगण्यात आले. या उपक्रमामध्ये महिला बचत गटांनाही विशेष महत्त्व देण्यात आले होते.