नवीन पलावा पुलावरून थरारक प्रवास

नवीन पलावा पुलावरून थरारक प्रवास
सकाळ वृत्तसेवा
डोंबिवली, ता. ६ : कल्याण- शिळ रोडवरील देसाई खाडी ते काटई नाका उड्डाणपुलाचे शुक्रवारी (ता. ४) शिवसेना शिंदे गटाने घाईघाईने उद्घाटन करून पूल वाहतुकीसाठी खुला केला; मात्र काम शिल्लक असल्याने त्वरित पूल बंद करण्यात आला. असे असले तरी येथील अडथळा काढल्याने काही वाहनचालक पुलावरून वाहने नेत आहेत; मात्र येथून प्रवास करणे फारच धोकादायक आहे. बारीक खडीचा थर, पावसाने पडलेले खड्डे अन् त्यात साचलेले पाणी यामुळे अपघाताची भीती व्यक्त होत आहे.

कल्याण- शिळ रोडवरील देसाई खाडी ते काटई नाका या नवीन पलावा उड्डाणपुलाचे शिंदे गटाचे आमदार राजेश मोरे आणि शिवसैनिकांनी शुक्रवारी सकाळी घाईघाईने उद्घाटन केले. नव्या पुलावरील रस्त्यावर डांबर, सिमेंट आणि रसायन मिश्रणाचा विशिष्ट थर पसरविण्याचे काम बाकी असताना उद्घाटन केल्याने सर्वच स्तरातून टीका केली जात आहे. या पुलाचे स्थापत्यकाम पूर्ण झाले असले तरी पुलावर वाहनांची चाके घसरू नयेत, यासाठी विशिष्ट रसायनमिश्रित (मास्टेक अस्फाल्ट) एक थर पुलावरील रस्त्यावर टाकला जातो. त्यामुळे वाहन या गुळगुळीत रस्त्यावर समतलपणे धावतात.

पुलाचे उद्घाटन केल्यानंतर पहिल्या अर्ध्या तासात दोन ते तीन दुचाकीस्वार घसरून पडले होते. पुलाचे उद्घाटन केल्यानंतर अवघ्या काही तासांत पूल सुरक्षिततेच्या दृष्टीने वाहतुकीसाठी बंद केला. या पुलाच्या काही भागात डांबरमिश्रीत रसायन टाकले. काही ठिकाणी खडीची पावडर (ग्रीट) टाकण्यात आली आहे. रस्त्यावर थर टाकण्याचे नियोजन फसल्याने पुलावर आता माती, खडी पावडर आणि पावसाच्या पाण्यामुळे चिखल झाला आहे, अशा तक्रारी प्रवाशांनी केल्या आहेत.