विधि कट्टा अंतर्गत नोटरी वकिलांसाठी मार्गदर्शन शिबिर

विधि कट्टाअंतर्गत नोटरी वकिलांसाठी मार्गदर्शन शिबिर
नवी मुंबई, ता. ६ (वार्ताहर) : नवी मुंबई न्यायालय बार असोसिएशनच्या विधी कट्टा या विशेष मंचच्या माध्यमातून बेलापूर न्यायालयात शनिवारी (ता. ५) नवनियुक्त आणि कार्यरत नोटरी वकिलांसाठी मार्गदर्शन व प्रशिक्षण शिबिर आयोजित केले आहे. या उपक्रमाला नवोदित नोटरी वकिलांचा मोठा प्रतिसाद मिळाला.
या शिबिराचे आयोजन नवी मुंबई कोर्ट बार असोसिएशनचे अध्यक्ष ॲड. सुनील मोकल आणि त्यांच्या कार्यकारी समितीच्या पुढाकाराने करण्यात आले. या शिबिरात महाराष्ट्र व गोवा नोटरी असोसिएशनचे अध्यक्ष ॲड. सय्यद अली सिकंदर यांनी प्रमुख मार्गदर्शक म्हणून उपस्थित वकिलांना नोटरीशी संबंधित महत्त्वाच्या बाबी समजावून सांगितल्या. केंद्र सरकार लवकरच सर्व नोटरी वकिलांना ओळखपत्र देणार असल्याची माहिती त्यांनी या वेळी दिली.
या वेळी नवी मुंबई जिल्हा नोटरी असोसिएशनचे अध्यक्ष ॲड. समित चिंतामण राऊत यांनी अलीकडील काळात राज्यात मोठ्या प्रमाणावर वकिलांना नोटरी परवाने प्रदान करण्यात आले असून, नवोदितांना त्यांच्या कार्यात मार्गदर्शन करण्याची गरज भासत होती. त्यामुळे या शिबिराचे आयोजन करण्यात आल्याचे सांगितले. या कार्यक्रमात ज्येष्ठ नोटरी वकील ॲड. जे. एल. म्हात्रे, नवी मुंबईतील ज्येष्ठ वकील ॲड. शंकरराव वानखेडे तसेच रायगड जिल्हा नोटरी असोसिएशनचे अध्यक्ष ॲड. नागेश हिरवे यांचीही उपस्थिती होती.