बदलापूर गोळीबारप्रकरणी एकाला अटक

उल्हासनगर, ता. ६ (बातमीदार) : बदलापुरातील आमदार किसन कथोरे यांच्या निवासस्थानाबाहेर झालेल्या गोळीबारप्रकरणी देशी बनावटीची पिस्तूल व दुचाकी उल्हासनगर गुन्हे शाखेचे वरिष्ठ पोलिस निरीक्षक अशोक कोळी यांच्या पथकाने हस्तगत करून एकाला अटक केली आहे.
बदलापूर येथील गोळीबारात अल्ताफ शेख हे जखमी झाले आहेत. या गुन्ह्याचा समांतर तपास उल्हासनगर गुन्हे शाखेचे वरिष्ठ पोलिस निरीक्षक अशोक कोळी करत असताना पोलिस हवालदार राजेंद्र थोरवे यांना शुक्रवारी रात्री उशिराने गुप्त बातमीदारामार्फत गुन्ह्यातील संशयित शेखर रामचंद्र गडदे (वय २८) हा मुरबाडवरून उल्हासनगरमार्गे कल्याणला जाणार असल्याची माहिती मिळाली. वरिष्ठ पोलिस निरीक्षक अशोक कोळी यांच्या मार्गदर्शनाखाली सहाय्यक पोलिस निरीक्षक श्रीरंग गोसावी, हवालदार गणेश गावडे, योगेश वाघ, राजेंद्र थोरवे, चंद्रकांत सावंत, रितेश वंजारी, कॉन्स्टेबल अशोक थोरवे, संजय शेरमाळे यांनी एंटालिया प्रवेशद्वारासमोर शेखरवर झडप घातली. त्यांची तपासले असता त्याच्या दुचाकीच्या डिक्कीत गुन्ह्यात वापरलेले देशी बनावटीचे पिस्तूल आढळून आले. शेखरचा अभिलेख तपासला असता, त्याच्यावर अगोदर इतर गुन्हे दाखल आहेत. तसेच, हद्दपारीची कारवाई करण्यात आलेली आहे. पिस्तूल व दुचाकीचा पंचनामा करून त्याला मध्यरात्री साडेतीन वाजण्याच्या सुमारास बदलापूर पश्चिम पोलिस ठाण्याच्या सुपूर्द केल्याची माहिती वरिष्ठ पोलिस निरीक्षक अशोक कोळी यांनी दिली.