मंगळसूत्र चोरून चोरटे फरार

अंबरनाथ, ता. ६ (वार्ताहर) : अंबरनाथमध्ये महिलांच्या गळ्यातील सोने आणि रस्त्यावर उभ्या केलेल्या दुचाकी चोरण्याच्या घटनांमध्ये दिवसेंदिवस वाढ झाली आहे. २ जुलैला एका वृद्ध महिलेच्या गळ्यातून ६० हजारांचे मंगळसूत्र चोरल्याची घटना ताजी असतानाच आता अंबरनाथ पूर्वेला स्वामी समर्थ चौकात महिलेच्या गळ्यातील दीड तोळ्याचे मंगळसूत्र चोरले. नातीला शाळेच्या बसपर्यंत सोडवायला गेलेल्या आजीच्या गळ्यातील सव्वा लाखांचे मंगळसूत्र चोरल्याची घटना घडली आहे. चोरीच्या या वाढत्या घटना पाहता चोरांना पोलिसांचा धाक राहिला नाही का? असा प्रश्न उपस्थित केला जात आहे.
विजया देवसन नायर या ६२ वर्षीय ज्येष्ठ महिला अंबरनाथ पूर्व सिटी हॉस्पिटल बिकेबिन रोड येथील आनंद पार्क या सोसायटीत राहतात. त्या नेहमीप्रमाणे शुक्रवारी सकाळी ८.३० च्या सुमारास नात त्रिशाला शाळेच्या बसजवळ सोडवण्यासाठी सोसायटी पार्कच्या गेटजवळ थांबल्या होत्या. याच वेळी त्यांच्या मागून दुचाकीवर तीन जण आले आणि त्यांनी नायर यांच्या गळ्यातील साडेतीन तोळ्यो मंगळसूत्र जबरदस्तीने खेचून नेले. या वेळी चोरटे आणि महिला यांच्यामध्ये झालेल्या झटापटीत नायर आणि त्यांची नात जमिनीवर पडल्याने त्यांच्या हाताला, पायाला, गळ्यावर जखमा झाल्या.
दुसऱ्या घटनेत पूर्वेला स्वामी समर्थ मठात आसावरी देसाई या (वय ७०) मंगळवारी गेल्या होत्या. मठाबाहेर पडल्यानंतर दुपारी साडेबाराच्या सुमारास दोन दुचाकीचालकांनी त्यांना बोलण्यात गुंतवून त्यांच्या गळ्यातील ५५ हजारांचे मंगळसूत्र पिशवीत काढून ठेवण्यास सांगितले. त्यानंतर चोरट्यांनी त्या ठिकाणाहून पळ काढला. दरम्यान, सुभाष गोंडाबे हे हात रुमाल विक्रेते त्यांनी ३० तारखेला अंबरनाथ नगर परिषदेच्या संरक्षक भिंतीजवळ दुचाकी उभी करून कामासाठी गेले होते. याचवेळी त्यांची दुचाकी चोरट्यानी लंपास केली. या तिन्हीप्रकरणी शिवाजीनगर पोलिस ठाण्यात आणि अंबरनाथ पोलिस ठाण्यात गुन्हा दाखल झाला आहे.