शिवमंदिर परिसरात रिंगण पाहण्यासाठी गर्दी

अंबरनाथ, ता. ६ (बातमीदार) : आषाढी एकादशीला अंबरनाथचे प्राचीन शिवमंदिर परिसर रामकृष्ण हरी आणि विठ्ठल नामाच्या जयघोषाने दुमदुमला. यानिमित्ताने उल्हासनगर कॅम्प पाचमधील विठ्ठल मंदिरातून दरवर्षीप्रमाणे यंदाही दिंडी यात्रा निघाली होती. टाळ-मृदंगाच्या गजरात आणि ‘राम कृष्ण हरी’च्या जयघोषात पारंपरिक वारकरी पोशाखातील महिला, पुरुष, तसेच लहान मुलांनी दिंडीत सहभाग घेतला. उल्हासनगर शहरात जेवणाचे डबे वाहतूक करणाऱ्या बांधवांनी पंढरपूरला प्रत्यक्ष न जाता अंबरनाथच्या शिवमंदिरात वारीचा आनंदोत्सव अनुभवण्यासाठी काही वर्षांपासून ही परंपरा सुरू केली आहे. गायकवाड पाड्यातील विठ्ठल रुक्मिणी मंदिरातून निघालेली दिंडी प्राचीन शिवमंदिरात दाखल झाली. या वेळी शिवमंदिरात रिंगण पाहण्यासाठी भाविकांची मोठी गर्दी झाली होती.