महिलेकडून पतीसह मुलीला मारहाण

सकाळ वृत्तसेवा
ठाणे, ता. ६ : समाज माध्यमांच्या आहारी गेलेल्या पत्नीला पतीने हटकले असता, दोघांमध्ये भांडण सुरू झाले. भांडण सोडवण्यासाठी गेलेल्या मुलीला आणि पतीला तिने मारहाण केली. तसेच कोणालाच सोडणार नाही, अशी धमकी देत तक्रारदारांचा मोबाइल फोडला. याप्रकरणी महिलेविरोधात गुन्हा दाखल असल्याची माहिती मुंब्रा पोलिसांनी दिली. दोन महिन्यांमधील अशा प्रकारचा हा दुसरा गुन्हा दाखल असल्याचे पोलिसांनी म्हटले आहे.
तक्रारदार हे मुंबईत खासगी नोकरी करतात. ते पत्नी, तीन मुली आणि एक मुलासह मुंब्र्यात वास्तव्यास आहेत. त्यांची पत्नी २०१९पासून समाज माध्यमांचा जास्त वापर करत आहे. अति वापरामुळे तिचे घर आणि मुलांकडे दुर्लक्ष करत असल्याचे तक्रारीत म्हटले आहे. समाज माध्यमांवर ती व्हिडीओ कॉलवर इतर पुरुषांसोबत बोलत असल्याने याचा जाब तक्रारदाराने विचारला होता. मात्र, याचा राग आल्याने तिने मारहाण करून जखमी केल्याचे तक्रारीत नमूद केले आहे. भांडण सोडविण्यासाठी आलेल्या मुलीलाही मारहाण करून तक्रारदारांचे पासपोर्ट, चालक परवाना, पॅन कार्ड व महत्त्वाची कागदपत्रे फाडून टाकली. तक्रारदारांचा मोबाइल तोडून नुकसान केले, असे तक्रारीत नमूद केले आहे. याप्रकरणी गुन्हा दाखल केल्याची माहिती मुंब्रा पोलिसांनी दिली.