तळोजातून दोन लाख रुपये किंमतीचा गुटखा जप्‍त

तळोज्यातून दोन लाख रुपये किमतीचा गुटखा जप्‍त
पनवेल, ता. ६ (वार्ताहर) ः तळोजा पोलिसांनी फेज एकमधील दुकानावर छापा मारून महाराष्ट्रात प्रतिबंधित असलेला सुमारे दोन लाख रुपये किमतीचा गुटखा, पानमसाला व सुगंधी तंबाखूचा साठा जप्त केला आहे. या कारवाईत पोलिसांनी रामसिंग रेहवतसिंग टेवडा (वय ४८) या दुकानदाराला अटक केली आहे. या दुकानदाराने गुटखा व तंबाखूजन्य पदार्थ कुठून आणला, याबाबत पोलिसांकडून अधिक तपास करण्यात येत आहे.
तळोजा फेज-एक सेक्टर दोनमधील सिल्व्हर पार्क सोसायटीतील दुकानदाराने प्रतिबंधित केलेला गुटखा, सुगंधी पानमसाला व सुगंधी तंबाखूचा साठा विक्रीसाठी साठवणूक करून ठेवल्याची माहिती तळोजा पोलिसांना मिळाली होती. त्यानुसार वरिष्ठ पोलिस निरीक्षक प्रवीण भगत यांच्या मार्गदर्शनाखाली सहाय्यक पोलिस निरीक्षक विकास पठाडे व त्यांच्या पथकाने गत गुरुवारी रात्री साडेअकरा वाजता दुकानावर छापा मारला. त्यानंतर पोलिसांनी दुकानाची तपासणी केली असता, त्यांच्या दुकानामध्ये नायलॉनच्या गोण्यांमध्ये सुमारे दोन लाख रुपये किमतीचा गुटखा, सुगंधी पानमसाला व सुगंधी तंबाखूचा साठा करून ठेवण्यात आल्याचे आढळून आले. त्यानंतर पोलिसांनी गुटख्याचा साठा जप्त करून रामसिंग टेवडा याच्याविरोधात अन्न सुरक्षा आणि मानके अधिनियमानुसार गुन्हा दाखल करून त्याला अटक केली आहे. आरोपी रामसिंग टेवडा याने प्रतिबंधित गुटखा, पानमसाला, सुगंधी तंबाखू कुठून आणला, याचा पोलिसांकडून अधिक तपास करण्यात येत आहे.