म्हाडाच्या आलीशान घरांना मिळाली ओसी

म्हाडाच्या आलिशान घरांना मिळाली ओसी
३३० विजेत्यांना घरांचा ताबा मिळणार
सकाळ वृत्तसेवा
मुंबई, ता. ६ ः म्हाडाच्या गोरेगाव, प्रेमनगर येथील आलिशान घरांच्या प्रकल्पाला भोगवटा प्रमाणपत्र (ओसी) मिळाले आहे. त्यामुळे प्रतीक्षेत असलेल्या ३३० लाॅटरी विजेत्यांना लवकरच घराचा ताबा मिळणार आहे. त्या पार्श्वभूमीवर म्हाडाने संबंधितांना देकारपत्र पाठवण्यास सुरुवात केली आहे.
म्हाडातर्फे घरांसाठी जाहिरात काढण्यात आली होती. त्यामध्ये बांधकाम सुरू असलेल्या १,३२७ घरांचादेखील समावेश होता. लाॅटरीमध्ये विजेते ठरल्यानंतरही संबंधित अर्जदार घराच्या प्रतीक्षेत होते. त्यापैकी गोरेगाव प्रेमनगर येथील ३३२ हायफाय घरे असलेल्या इमारतीचे बांधकाम मार्चपर्यंत पूर्ण करून मेपासून विजेत्यांना देकारपत्र पाठवण्याचे म्हाडाचे नियोजन होते; मात्र प्रकल्पाला ओसी न मिळाल्यामुळे विजेते घराच्या प्रतीक्षेत होते. दरम्यान, इमारतीचे काम पूर्ण झाल्यावर पाणी जोडणी आणि अग्निशमन दलाची एसओसी मिळाल्यानंतर त्यांना अंतिम भोगवटा प्रमाणपत्र मिळाले आहे. त्यामुळे विजेत्यांना घराचा ताबा देण्याच्या दृष्टीने महत्त्वपूर्ण असलेले देकारपत्र म्हाडाने संबंधितांना पाठवण्यास सुरुवात केली आहे. त्यामुळे हायफाय घराचे स्वप्न उराशी बाळगलेल्या विजेत्यांना घराचा ताबा मिळणार असल्याचे निश्चित झाले आहे. येथील घरांच्या किमती एक कोटीच्या घरात असून या प्रकल्पात जीम, स्विमिंग पूल, पोडियम पार्किंग अशा सुविधा दिल्या आहेत.