कामगारांच्या सुरक्षेसाठी महावितरणचे पाऊल

कामगारांच्या सुरक्षेसाठी महावितरणचे पाऊल
एका क्लिकवर सुरक्षा साधने

सकाळ वृत्तसेवा
मुंबई, ता. ६ : वीज यंत्रणेत सुरक्षितपणे देखभाल व दुरुस्तीचे कामे करण्यासाठी तांत्रिक कर्मचाऱ्यांना महावितरणकडून २० ते २५ प्रकारचे वैयक्तिक व कॉमन सुरक्षा साधने देण्यात येतात. ही सुरक्षा साधने मिळण्यासाठी आता एका क्लिकवर मागणी नोंदवता येणार आहे. महावितरणने त्यासाठी ऑनलाइन ‘टी ॲण्ड पी रजिस्टर मॉड्यूल’ सुरू केले आहे. त्यामुळे कर्मचाऱ्यांना सहजपणे सुरक्षा साधने उपलब्ध होऊ शकणार असल्याने विजेच्या धक्क्यामुळे होणारे अपघात कमी होऊ शकणार आहेत.
महावितरणच्या एम्प्लॉई पोर्टलवरील या स्वतंत्र मॉड्युलमुळे सुरक्षेचे सर्व साधने व साहित्य तसेच चाचणी उपकरणांची उपलब्धता, वितरण, मागणी, पुरवठा व प्राप्तीची नोंद आदींचा लेखाजोगा ऑनलाइन उपलब्ध राहणार आहे. महावितरणचे ग्रामीण, शहरी शाखा कार्यालये, वीज उपकेंद्र, चाचणी विभाग, भरारी पथक, फिल्टर युनिट आदी कार्यालयातील तांत्रिक कर्मचाऱ्यांना सुरक्षा साधने आणि चाचणीसाठी काही उपकरणे देण्यात येतात. आतापर्यंत या साहित्यांची लेखी मागणी नोंदविणे, त्यास मंजुरी मिळणे, मंडल कार्यालयाकडून ते उपलब्ध होणे व वितरित होणे ही पारंपरिक प्रक्रिया सुरू होती. दरम्यान, तांत्रिक कर्मचाऱ्यांना सुरक्षा साधने आवश्यकता व मागणीनुसार तत्काळ उपलब्ध व्हावीत, यासाठी ही संपूर्ण प्रक्रिया स्वतंत्र मॉड्युलद्वारे ऑनलाइन करण्याची सूचना कंपनीचे अध्यक्ष व व्यवस्थापकीय संचालक लोकेश चंद्र यांनी केली होती. त्यानुसार प्रशिक्षण व सुरक्षा आणि माहिती तंत्रज्ञान विभागाने संयुक्तपणे या मॉड्युलची निर्मिती केली आहे.