‘चला मराठी शिकवू या, एकतेसाठी’

‘चला मराठी शिकवू या, एकतेसाठी’
मिरा भाईंदरमध्ये परिवहन मंत्री प्रताप सरनाईक यांचा उपक्रम
सकाळ वृत्तसेवा
मुंबई भाईंदर, ता. ६ (बातमीदार) : हिंदी-मराठी वादाच्या पार्श्‍वभूमीवर परिवहन मंत्री प्रताप सरनाईक यांनी ‘चला मराठी शिकवू या, मिरा भाईंदरच्या एकतेसाठी’ असा संदेश दिला आहे. ‘मिरा-भाईंदरमध्ये कोणताही भाषावाद नको. आम्ही विकासासाठी आलो आहोत, फूट पाडण्यासाठी नाही,’ असे सरनाईक यांनी शनिवारी (ता. ६) सांगितले.

सरनाईक म्हणाले, ‘मिरा-भाईंदरमध्ये शिवसेनेचे २२ नगरसेवक आहेत. त्यापैकी बहुतांश नगरसेवक हे अमराठी आहेत. तसेच मिरा-भाईंदर हे एक शांतताप्रिय शहर आहे. तिथे सर्व जातीधर्मांचे लोक एकत्र राहतात. अमराठी नागरिकांनी सहजतेने मराठी शिकावी, यासाठी शिवसेनेच्या प्रत्येक शाखेत बाराखडीची पुस्तके ठेवण्यात येणार असून, मराठी शिक्षणाची मोफत व्यवस्था करण्यात येणार आहे. या उपक्रमाच्या माध्यमातून कोणावरही जबरदस्ती न करता प्रेमाने मराठी शिकवण्यात येईल. मी गेल्या चार टर्म मिरा-भाईंदरमधून आमदार म्हणून निवडून आलो आहे. येथे राहणाऱ्या प्रत्येक भाषेच्या नागरिकांनी मला मत दिले आहे. मिरा-भाईंदरमध्ये शिवसेनेचे २२ नगरसेवक आहेत. त्यापैकी बहुतांश नगरसेवक हे अमराठी आहेत. हे शहर आगरी-कोळ्यांचे आहे. या शहरात देशभरातून कानाकोपऱ्यातून येणारे हे हिंदी भाषिक लोक आगरी-कोळी संस्कृती जपत मंगळागौर, गणेशोत्सवासारखे उपक्रम स्वतः राबवतात. त्यामुळे या शहराची शांतता भंग करण्याचा प्रयत्न कोणीही करू नये.’

मिरा-भाईंदरमध्ये हिंदी व मराठी पदाधिकारी शिवसेनेत वर्षानुवर्षे खांद्याला खांदा लावून काम करीत आहेत, मात्र काही राजकीय नेते या शांततेला तडे देण्याचा प्रयत्न करीत आहेत. भाषावाद पेटवून स्वार्थ साधण्यापेक्षा सर्व नागरिकांना बरोबर घेऊन विकास हाच आमचा उद्देश आहे. शिवसेनेच्या माध्यमातून हा मराठी स्नेह उपक्रम सुरू करीत आहोत. अमराठी बांधवांनी शिवसेना शाखेत येऊन प्रेमाने मराठी शिकावी. भाषेचा सेतू बांधू या, भिंती नाही.
- प्रताप सरनाईक, परिवहन मंत्री