अथक शोध मोहिमेनंतर भारंगीनदीत बुडालेल्या सार्थकचा मृतदेह सापडला

भारंगी नदीत बुडालेल्या सार्थकचा मृतदेह अखेर हाती
शहापूर, ता. ६ (वार्ताहर) : शहरातून वाहणाऱ्या भारंगी नदीत बुडालेल्या कल्याण येथील सार्थक कोळी (वय १७) याचा मृतदेह अखेर अथक शोधमोहिमेनंतर रविवारी (ता. ६) सापडला. मृत सार्थक नदीत बुडाल्याची घटना बुधवारी (ता. २) घडली होती. त्यानंतर शहापूर पोलिस आणि तहसील कार्यालयाची आपत्ती व्यवस्थापन टीम आणि जीवरक्षक टीमकडून मृतदेहाचा शोध सुरू होता.
शहापूर शहरातील कासार आळी भागात राहणाऱ्या एका व्यक्तीने नदीकाठच्या झुडपांमध्ये मृतदेह असल्याची माहिती शहापूर पोलिसांना रविवारी दिली. त्यानुसार शोध घेतला असता तेथे सार्थकचा मृतदेह सापडला. याआधी सतत चार दिवस त्याच्या मृतदेहाचा नदीच्या पाण्यातील खोल भाग, तळ आणि झुडपांमध्ये शोध घेतला जात होता.
सार्थक शहापूरजवळच्या आसनगांव येथील शिवाजीराव जोंधळे अभियांत्रिकी महाविद्यालयात शिकत होता. बुधवारी तो सहा मित्रांसोबत पळसपाडा येथील भारंगी नदी भागात आला असता, पोहण्यासाठी नदीत उतरला; परंतु पाण्याचा अंदाज न आल्याने तो बुडाला. ते पाहून सोबतच्या मित्रांनी घटनास्थळावरून पोबारा केला. शिवाय सार्थकच्या पालकांनादेखील त्यांनी कळविले नाही. त्याची बॅगही खडवली रेल्वे स्थानकानजीक लोहमार्गावर फेकून दिली. दरम्यान, बराच उशीर होऊनही सार्थक घरी पोहोचला नसल्याने पालकांनी शोधाशोध करून मित्रांना विचारपूस केल्यावर सार्थक बुडाल्याची माहिती त्यांनी दिली. त्यानंंतर मृतदेहाचा शोध सुरूच होता. अखेर रविवारी त्याचा मृतदेह सापडला असून, कुटुंबीयांच्या स्वाधीन करण्यात आला आहे.