मुंबई विद्यापीठात अन्य भाषिकांसाठी मराठीचे ऑनलाइन धडे

मुंबई विद्यापीठात मराठीचे ऑनलाइन धडे

मुंबई, ता. ६ : मुंबई आणि परिसरातील अन्य भाषिकांना मराठीचे धडे देण्यात येणार आहेत. त्यासाठी मुंबई विद्यापीठाच्या जर्मन विभागात या वर्षीच्या संवादात्मक मराठी अभ्यासक्रमाचे स्तर १चे वर्ग आजपासून सुरू झाले आहेत. या अभ्यासक्रमासाठीची प्रवेश प्रक्रिया अजूनही सुरू असून, रविवारी सकाळी ९ ते दुपारी १ या वेळेत एक वर्षासाठी ऑनलाइन पद्धतीने अभ्यासक्रम शिकवला जाईल.
या अभ्यासक्रमातून विद्यार्थ्यांना मराठी बोलणे, वाचणे, लेखन आणि ऐकणे ही कौशल्ये शिकवली जातात. यासोबत व्याकरण, शब्दसंपत्ती आणि संवाद कौशल्यांचा चांगला सरावदेखील केला जातो. प्रमाणपत्र अभ्यासक्रम हा स्तर १ म्हणजे नवीन विद्यार्थ्यांसाठी आहे. प्रवेश व वर्ग दोन्ही ऑनलाइन स्वरूपात उपलब्ध आहेत. ह्या अभ्यासक्रमाचे एकूण सहा स्तर असून, पहिले तीन स्तर मुंबई विद्यापीठाच्या जर्मन विभागामार्फत शिकवले जात आहेत. हे अभ्यासक्रम भारतीय आणि विदेशी विद्यार्थ्यांमध्ये अतिशय लोकप्रिय आहेत. सध्या एक जपानी आणि एक अमेरिकी विद्यार्थी, भारतीय विद्यार्थ्यांसह संवादात्मक मराठीचा दुसरा स्तर शिकत आहेत.
मराठी शिकण्यासाठी सर्व पुस्तके आणि ऑडिओ-व्हिज्युअल साहित्य मुंबई विद्यापीठाच्या संकेतस्थळावर विनामूल्य डाउनलोड करण्यासाठी उपलब्ध करून दिले आहे. तसेच अभ्यासक्रमाची प्रवेश प्रक्रिया याच संकेतस्थळावर उपलब्ध असून, हे अभ्यासक्रम मुंबई विद्यापीठाद्वारे राबविण्यात आलेल्या एका यशस्वी प्रकल्पाचा भाग आहेत. या प्रकल्पामध्ये मराठी तज्ज्ञ, अभिनेते आमिर खान, राज्य मराठी विकास संस्था आणि जर्मन भाषा अध्यापनशास्त्राचे योगदान आहे. या प्रकल्पांतर्गत एकूण सहा स्तरांकरिता मराठी शिकण्यासाठी पाठ्यपुस्तके, कार्यपुस्तिका आणि ऑडिओ-व्हिज्युअल साहित्य तयार करण्यात आले असल्याचे विभागप्रमुख प्रा. विभा सुराणा यांनी सांगितले.

पुस्तके आणि इतर सामग्री
चार विशिष्ट गटांसाठी ऑडिओ-व्हिज्युअल सामग्रीसह मराठी शिकवणारी पुस्तकेही तयार करण्यात आली असून, यात रिक्षा व टॅक्सीचालकांसाठी मराठी, परिचारिकांसाठी, बँक कर्मचाऱ्यांसाठी मराठी आणि शासकीय कर्मचाऱ्यांसाठी मराठी पुस्तकांचा समावेश आहे. या अभ्यासक्रमासाठी german-mu.com या संकेतस्थळावरून किंवा germandept.head@mu.ac.in इथे उपललब्ध करून देण्यात आली आहेत.