मुंबई-नाशिक महामार्गाच्या दुरवस्थेबाबत याचिका

मुंबई-नाशिक महामार्गाच्या दुरवस्थेबाबत याचिका
खासदार म्हात्रे यांची उच्च न्यायालयात धाव

शहापूर, ता. ६ (बातमीदार) : सरकारी अधिकारी व कंत्राटदार यांच्या भ्रष्टाचारामुळे मुंबई-नाशिक राष्ट्रीय महामार्गाची दुरवस्था झाल्याचा आरोप करीत खासदार सुरेश ऊर्फ बाळ्यामामा म्हात्रे यांनी मुंबई उच्च न्यायालयात धाव घेतली आहे. त्यांच्या नुकत्याच दाखल केलेल्या जनहित याचिकेवर प्राथमिक सुनावणी घेतल्यानंतर मुख्य न्यायमूर्ती आलोक आराधे यांच्या खंडपीठाने केंद्र आणि राज्य सरकारला नोटीस पाठवित पुढील सुनावणी १ ऑगस्टला ठेवली आहे.

म्हात्रे यांनी सांगितले, की सरकारी अधिकारी व कंत्राटदारांच्या भ्रष्टाचारामुळे मुंबई-नाशिक महामार्गाची दुरवस्था वर्षानुवर्षे कायम आहे. या मार्गावर जागोजागी खड्डे पडले असल्याने शहापूर, कसारा, भिवंडीदरम्यान बस अडकून पडण्याचे प्रकार वारंवार घडत आहेत. परिणामी विद्यार्थी, नोकरदार, शिक्षक अशा सर्व घटकांचे, वाहनधारकांचे खूप नुकसान होत आहे. खड्ड्यांमुळे अपघाताच्या घटनाही घडत आहेत. माजिवडा ते कल्याण बायपास रोड आणि पुढे माणकोली या मार्गात वाहनधारकांना सर्वाधिक त्रास होतो. शिवाय खराब रस्त्यामुळे वाहतूक कोंडीचा जाच तर नेहमीचाच झाला आहे. पडघा ते वासिंददरम्यान नियमित प्रवास करणाऱ्यांचेही खूप हाल होतात. राष्ट्रीय महामार्ग प्राधिकरण, केंद्रीय रस्ते व परिवहन मंत्रालय, राज्य सरकार, भिवंडी उपविभागीय अधिकारी, ठाणे पोलिस आयुक्त आदींना या याचिकेत प्रतिवादी केल्याची माहिती म्हात्रे यांनी दिली.

प्रशासनाकडे वेळोवेळी तक्रारी दिल्यानंतरही त्याकडे दुर्लक्ष करण्यात आले. महामार्गाची दुर्दशा तत्कालीन मुख्यमंत्री एकनाथ शिंदे व उपमुख्यमंत्री अजित पवार यांच्या निदर्शनास आणली होती. तसेच चांगला रस्ता उपलब्ध केला जाईपर्यंत टोलवसुली थांबवण्याची विनंती केली होती. त्या वेळी संबंधित अधिकाऱ्यांना आवश्यक ती उपाययोजना करण्याचे निर्देश उपमुख्यमंत्र्यांनी दिले होते; तरीही काहीच ठोस उपाययोजना झाली नाही. शिवाय टोलवसुली करणाऱ्या कंपनीकडून टोलवसुलीच्या आकडेवारीविषयी लपवाछपवी करण्यात येत आहे. म्हणून ही याचिका करावी लागली आहे.
- सुरेश ऊर्फ बाळ्यामामा म्हात्रे, खासदार