सराईत गुन्हेगार वर्षभरासाठी स्थानबद्ध

भिवंडी, ता. ७ (वार्ताहर)ः शहरातील शांतिनगर परिसरातील सराईत गुन्हेगारावर मोक्काअंतर्गत कारवाई करण्यात आली आहे. सफरअली मोहम्मद युसुफ (युनूस) शेख ऊर्फ गफु, (वय ४२ वर्षे, रा. गैबीनगर) असे आरोपीचे नाव असून, त्याला एक वर्षासाठी स्थानबद्ध करण्यात आले आहे.
शांतिनगर पोलिस ठाणे अभिलेखावरील सराईत गुन्हेगार असलेल्या सफरअली शेख हा भिवंडी शहर तसेच परिसरात दहशत पसरवत होता. २००२ मध्ये त्याच्यावर गंभीर स्वरूपाचा पहिला गुन्हा नोंदवला गेला होता. त्यानंतर भिवंडी शहरातील शांतिनगर, भोईवाडा, भिवंडी शहर, निजामपुरा तसेच मीरा रोड पोलिस ठाणे येथे हत्येचा प्रयत्न करणे, गैर कायद्याचा जमाव करून मारामारी करणे, मालमत्तेचे नुकसान करणे, चोरी करणे, दरोडा टाकणे, जबरी चोरी करण्याचे उद्देशाने जबर दुखापत करणे, घातक शस्त्र बाळगणे मनाई आदेशांचे उल्लंघन करणे, लोकसेवकाला मारहाण करणे, गोवंशची चोरी करून त्याची कत्तल करून गोमांस जवळ बाळगून मांसविक्री करणे अशा प्रकारचे गंभीर गुन्हे दाखल होते. तसेच भिवंडी शहर पोलिस ठाणे यांनी सीआरपीसी ११० प्रमाणे प्राथमिक प्रतिबंधक कारवाईनंतरही शांतिनगर तसेच निजामपुरा पोलिस ठाणे येथे गंभीर स्वरूपाचे गुन्हे दाखल होते.