तानसा नदीला पूर

तानसा नदीला पूर
अकलोलीतील गरम पाण्याची कुंड बुडाली

वज्रेश्वरी, ता. ७ (बातमीदार) : भिवंडी तालुक्यातील पर्यटनस्थळ व गरम पाण्याची कुंड असलेल्या अकलोलीला पुराचा फटका बसला आहे. तानसा नदीला पूर आल्याने येथील जनजीवन विस्कळित झाले आहे. तसेच नदीतील काही गरम पाण्याची कुंड पाण्याखाली बुडाली आहेत.

रविवारी (ता. ६) गणेशपुरी, वज्रेश्वरी, अकलोली, अंबाडी परिसराला पावसाने पूर्ण झोडपले आहे. त्यामुळे येथील नदीनाले तुडुंब भरून वाहत आहेत. त्यामुळे तानसा नदीला पूर आला आहे. त्यामुळे येथील जनजीवन विस्कळित झाले आहे. या अतिवृष्टीमुळे भातशेतीचे मोठ्या प्रमाणात नुकसान झाले आहे, तर नदीकिनाऱ्यालगतची गरम पाण्याची कुंड बुडली आहेत. काही घरात पुराचे पाणी शिरले आहे, या भागात पावसाची संततधार सुरू आहे. त्यात सोमवारी (ता. ७) पहाटेपासून या भागात जोरदार पाऊस आहे. त्यामुळे काही नागरिकांनी घरीच राहणे पसंत केले. मुसळधार पावसामुळे अंबाडी नाका परिसरातील रस्ता व पुलाखाली पाणी गेल्याने त्याचा वाहतुकीवर परिणाम झाला आहे.

रसत्यातील खड्ड्यांमुळे काही वाहनांना किरकोळ अपघात होत आहेत, तर जड वाहने नादुरुस्त होत आहेत. दरम्यान, या पावसाचा फटका येथील जवळच्या गोराड, निंबवली, अवचित पाड्यालादेखील बसला आहे. त्यामुळे येथील जनजीवन विस्कळित झाले आहे. दरम्यान, शनिवार व रविवारी मोठ्या प्रमाणात भाविक, पर्यटक भरपावसातही गरम पाण्यात अंघोळ करण्यासाठी येत आहेत. या कुंडांवरून पाणी जात असल्याने पर्यटकांनी या ठिकाणी येऊ नये, असे आवाहन गणेशपुरी पोलिस ठाण्याकडून करण्यात येत आहे. या वेळी गणेशपुरी पोलिस ठाण्याचे सहाय्यक पोलिस निरीक्षक कमलेश बच्छाव यांनी अकलोली येथील कुंड आणि नदीकिनारी भागात भेट देत पाहणी केली.