गाडी बाजूला करण्याच्या कारणावरून वाद

उल्हासनगर, ता. ७ (वार्ताहर) : रस्त्यात गाडी आडवी लावल्यावरून केवळ ‘रस्ता मोकळा करा’ एवढे बोलणे एका तरुणाच्या जीवावर बेतले. उल्हासनगरातील कॅम्प तीनमध्ये एका तरुणावर धारदार शस्त्राने प्राणघातक हल्ला झाल्याची घटना उघडकीस आली आहे. रस्त्यावर गाडी लावण्याच्या किरकोळ वादातून हे हिंसक रूप धारण झाले आहे.
उल्हासनगर कॅम्प तीनमधील पंजाबी कॉलनी चौकात शनिवारी सायंकाळच्या सुमारास काही तरुणांनी चारचाकी गाडी रस्त्यात आडवी लावल्याने वाहतुकीस अडथळा निर्माण झाला होता. याच दरम्यान जगदीश हा तरुण कामावरून घरी परतत असताना त्याने गाडी बाजूला करण्याची विनंती केली. त्याच्या या बोलण्यावरून तरुणांनी संतापून त्याच्यासोबत वाद केला. वाद विकोपाला गेल्यानंतर एकाने अचानक धारदार शस्त्राने जगदीशवर हल्ला केला. या हल्ल्यात जगदीश गंभीर जखमी झाला असून, त्याला तातडीने उल्हासनगरच्या मध्यवर्ती रुग्णालयात नेण्यात आले. प्रकृती गंभीर असल्याने त्याला पुढील उपचारासाठी खासगी रुग्णालयात हलवण्यात आले आहे. पोलिसांनी या प्रकाराची गंभीर दखल घेऊन त्वरित कारवाई करावी, अशी मागणी स्थानिक नागरिकांकडून होत आहे.