वावेहवेली धरण पर्यटकांना खुणावतेय

वावेहवेली धरण पर्यटकांना खुणावतेय
तळा, ता. ७ (बातमीदार) ः तळा तालुक्यातील वावेहवेली धरण ओव्हरफ्लो झाले आहे. त्‍यामुळे मागील काही दिवसांपासून धरण परिसरात प्रवाहित झालेला धबधबा अनुभवयासाठी पर्यटक येत आहेत, मात्र अशा ठिकाणी पर्यटकांनी सुरक्षेला प्रथम प्राधान्य द्यावे, असे प्रशासनाकडून सांगण्यात येत आहे. तसेच अतिमुसळधार पावसात धरण परिसरात येऊ नये, असे आवाहन प्रशासनाकडून करण्यात येत आहे.
वावेहवेली धरण हे मुंबई-गोवा महामार्गावर इंदापूरपासून अवघ्या १० किलोमीटर अंतरावर आहे. धरणाचा परिसर निसर्गरम्य असून, वृक्षवेलींनी बहरलेला आहे. मागील काही दिवसांपासून सतत कोसळणाऱ्या पावसामुळे धरण तुडुंब भरून वाहू लागले आहे. त्‍यामुळे धरण परिसरात मोठ्या प्रमाणात अनेक धबधबे प्रवाहित झाले आहेत. या धबधब्याचा आनंद घेण्यासाठी मुंबई, पुण्यातून मोठ्या प्रमाणात पर्यटक येत आहेत, मात्र सध्या पर्यटनस्‍थळांवर मोठ्या प्रमाणात पर्यटकांचे अपघात होत आहेत. त्‍यामुळे पर्यटकांनी पर्यावरणाचा आनंद घेताना सुरक्षितता बाळगावी, असे आवाहन प्रशासनाने केले आहे, तर पर्यटकांनीदेखील निसर्गाचा आनंद लुटताना काळजी घ्यावी, उत्‍साहाच्या भरात अपघात घडू शकतो. त्‍यामुळे संबंधित पर्यटनस्‍थळावर बंदी घालण्यात येते. त्‍यामुळे इतर पर्यटकांना या अतिउत्‍साही लोकांमुळे पर्यटनाला मुकावे लागते, असे जागरूक पर्यटकांकडून सांगण्यात येत आहे.