तुर्भे ट्रक टर्मिनलमध्ये भीषण आग

नवी मुंबई, ता. ७ (वार्ताहर) : तुर्भे सेक्टर-२० मधील ट्रक टर्मिनल परिसरात रविवारी (ता. ६) रात्री ११च्या सुमारास भीषण आग लागली. पुठ्ठ्याचे बॉक्स आणि प्लॅस्‍टिक क्रेट्स साठवलेल्या जागेपासून लागलेल्या आगीने काही क्षणांत रौद्ररूप धारण केले. यात जीवितहानी टळली असली तरी मोठे आर्थिक नुकसान झाले आहे. एकूण सात ट्रक आणि एक जेसीबी वाहन खाक झाले.
आगीची माहिती मिळताच नवी मुंबई महापालिकेतील अग्निशमन दलाच्या सहा गाड्या आणि एमआयडीसी अग्निशमनच्या दोन गाड्या घटनास्थळी दाखल झाल्या. रात्रभर प्रयत्न केल्‍यावर पहाटे आग नियंत्रणात आली. अग्निशमन दलाकडून सोमवार दुपारीपर्यंत घटनास्थळी कुलिंगचे काम सुरू होते. खबरदारीचा उपाय म्हणून पार्किंगमधील इतर वाहने तत्काळ सुरक्षितस्थळी हलवण्यात आली आहेत.
आग कशामुळे लागली, हे अद्याप स्पष्ट झालेले नाही. पोलिस तसेच अग्निशमन विभागाकडून त्याबाबत तपास सुरू आहे. या दुर्घटनेची एपीएमसी पोलिस ठाण्यात नोंद करण्यात आली आहे.