एसटी सवलतीचा १७३७ विद्यार्थिनींना लाभ

पनवेल, ता. ७ (बातमीदार) ः ग्रामीण भागातील मुलींच्या शिक्षणाला चालना देण्यासाठी राज्य सरकारने ‘अहिल्याबाई होळकर मोफत एसटी पास’ योजना सुरू केली आहे. योजनेला पनवेल तालुक्यात चांगला प्रतिसाद मिळत आहे. जुलैपर्यंत पनवेल आगारांमधून एक हजार ७३७ विद्यार्थिनींनी योजनेचा लाभ घेतला आहे. गतवर्षीच्या तुलनेत यंदा लाभ घेणाऱ्यांच्या संख्येत वाढ झाली आहे.
राज्य मार्ग परिवहन महामंडळाकडून ‘अहिल्याबाई होळकर मुलींसाठी मोफत पास’ योजनेंतर्गत बारावीपर्यंत शिक्षण घेणाऱ्या मुलींना प्रवासात सवलत दिली जाते. शाळा आणि महाविद्यालयात जाणाऱ्या सर्व मुलांना आणि बारावीपुढील शिक्षण घेणाऱ्या मुलींना ६६.६७ टक्के सवलत दिली जाते. १९८६ नंतर सुरू झालेले राज्य सरकार मान्यताप्राप्त विविध तंत्र आणि व्यावसायिक शैक्षणिक अभ्यासक्रमांचे शिक्षण घेणाऱ्या विद्यार्थ्यांनाही एसटी पासमध्ये ६६.६७ टक्के सवलत दिली जाते. अहिल्याबाई होळकर योजनेंतर्गत पनवेल तालुक्यातील ग्रामीण भागामध्ये सर्वाधिक पास घेतले आहेत. दोन्ही योजनेचा ग्रामीण भागातील विद्यार्थ्यांना आणि विद्यार्थिनींना फायदा होत असल्याचे दिसून येते.

विद्यार्थ्यांना एसटी पास आता त्यांच्या शाळेत वितरित करण्यात येत आहेत. त्यामुळे पास घेणाऱ्यांच्या संख्येत मोठी वाढ झाली आहे. गतवर्षीच्या तुलनेत यंदा ‘अहिल्याबाई होळकर मोफत एसटी पास’ योजनेला चांगला प्रतिसाद आहे.
- अश्विनी फाळके-खाबाडे, आगारप्रमुख, पनवेल