कल्याण-डोंबिवलीत साक्षरता दिंडी

कल्याण-डोंबिवलीत साक्षरता दिंडी
सकाळ वृत्तसेवा
डोंबिवली, ता. ७ : नवभारत साक्षरता कार्यक्रमांतर्गत कल्याण-डोंबिवली महापालिका क्षेत्रातील सर्व शाळांत साक्षरता दिंडीचे आयोजन केले होते. यात सर्वच शाळांनी सहभाग घेत सामाजिक संदेश देत दिंडी काढली. शालेय विद्यार्थीदेखील या दिंडीत पारंपरिक वेशभूषा परिधान करून सामील झाले होते.
आषाढी एकादशीनिमित्त योजना कार्यालय, पुणे आणि जिल्हा परिषद, ठाणे यांनी दिलेल्या सूचनेनुसार नवभारत साक्षरता कार्यक्रमांतर्गत कल्याण-डोंबिवली महापालिका क्षेत्रातील सर्व शाळांत साक्षरता दिंडीचे आयोजन केले. शिक्षण विभागाचे प्रशासन अधिकारी विजय चव्हाण आणि शिक्षणाधिकारी विजय सरकटे यांनी याबाबत शाळा प्रशासनाला सूचना दिल्या होत्या. त्यानुसार शनिवारी व रविवारी महापालिका क्षेत्रातील शाळांमधील चिमुकल्या मुला-मुलींनी भक्तिमय वातावरणात आणि वेशभूषा परिधान करून महापालिका परिसरात नवभारत साक्षरतेचे बॅनरसोबत घेत ‍सामाजिक संदेश देत वारकरी दिंडी व साक्षरता दिंडी काढली. या दिंडीत महापालिका क्षेत्रातील शाळांमधील अनेक विद्यार्थी, विद्यार्थिनी तसेच शिक्षकवर्ग सहभागी झाला होता.