संवाद हाच यशाची गुरूकिल्ली

भिवंडी, ता. ७ ः दहावीतील मुलांचे करिअर, वागणूक, मुलांमधील शारीरिक, मानसिक व बौद्धिक बदल या सगळ्यांचा एकंदरीत परिणाम पालक आणि विद्यार्थ्यांवर होत असतो. याच विषयावर मार्गदर्शन करण्यासाठी भिवंडी येथील एनईएस इंग्लिश मीडियम हायस्कूल आणि ज्युनियर कॉलेज ऑफ सायन्स अँड कॉमर्स येथे विद्यार्थी तसेच पालकांसाठी ‘सकाळ’ माध्यमातर्फे प्रसिद्ध समुपदेशक आरती बनसोडे यांनी मार्गदर्शन केले. या वेळी अतिशय खेळीमेळीच्या वातावरणात विद्यार्थी आणि पालकांसमोरील अडचणींचा आढावा घेण्यात आला.
विद्यार्थ्यांना तसेच पालकांना भेडसावत असणाऱ्या समस्यांवर सेमिनारमध्ये चर्चा करण्यात आल्या. विद्यार्थ्यांनी आपलं मन मोकळं करत त्यांच्या मनातील भीती आणि दडपण व्यक्त केले. त्याचप्रमाणे पालकांनीदेखील किशोरवयीन मुलांच्या संगोपनातील विविध अडचणी सांगितल्या. पालक आणि विद्यार्थ्यांमध्ये सुसंवाद कसा साधता येईल, त्याचे विश्लेषण आरती बनसोडे यांनी केले. आजची पिढी आणि तरुणाई ही माहिती आणि तंत्रज्ञान युगाची आहे. त्यामुळे स्वतःला अपडेट ठेवणे गरजेचे आहे. जेणेकरून मुलं आपल्या पालकांना कमी समजणार नाहीत. छोट्या छोट्या निर्णयांमध्ये मुलांना सहभागी करून घेतल्यास मुलांमध्ये आत्मविश्वास निर्माण होतो, असेदेखील बनसोडे यांनी सांगितले. या कार्यक्रमाला शाळेचे मुख्याध्यापक माननीय किरण वानखेडे, शिक्षिका गौरी कानडे, रोहिणी मोईली, जसप्रीत सूद, दीपा शर्मा आदी उपस्थित होते.