पर्यावरण संवेदनशील क्षेत्राला विरोध

पर्यावरण संवेदनशील क्षेत्राला विरोध
पहिला एल्गार रोह्यातून; क्षेत्र रद्द न केल्यास तीव्र आंदोलनाचा इशारा
रोहा, ता. ७ (बातमीदार) ः रायगड जिल्ह्यातील सात तालुक्यांत पर्यावरण संवेदनशील क्षेत्र घोषित करण्यात आल्याचा मसुदा तहसील कार्यालयाकडून देण्यात आला आहे. जिल्ह्यातील ४३७ गावे ही या क्षेत्राअंतर्गत केंद्र शासनाच्या मसुद्यामध्ये नमूद आहेत. त्यानुसार रोहा तालुक्यातील ११९ गावांना पर्यावरण संवेदनशील क्षेत्र म्‍हणून घोषित करण्यात आले आहे. याला रोहेकरांनी तीव्र विरोध केला आहे. रविवारी (ता. ६) सायंकाळी धानकान्हे येथील मारूती मंदिरात शेतकरी व ग्रामस्थांनी बैठक घेत पर्यावरण संवेदनशील क्षेत्राला विरोध करण्यात आला आहे. तसेच आंदोलन छेडण्याचा इशारा ग्रामस्‍थांनी दिला आहे.
रोहे तालुक्यातील देवकान्हे, धानकान्हे, चिल्हे व तळवली ही कोलाड पाटबंधारे विभाग (जलसंपदा विभाग) यांच्या अंतर्गत कालव्याच्या पाण्यावर ओलिताखाली असणारी गावे आहेत. या विभागात कोणत्याही दगडखाणी नाहीत. अभयारण्ये नाहीत किंवा कोणत्याही प्रकारे पर्यावरणाचा ऱ्हास होईल, असे कोणतेही काम गावांच्या हद्दीत नाही. तरीदेखील घोषित करण्यात आलेले पर्यावरण संवेदनशील क्षेत्र रद्द करावे, असे मत ग्रामस्थांनी व्यक्त केले आहे. ३१ जुलै २०२४ रोजी रायगड जिल्ह्यातील सात तालुक्यांतील ४३७ गावांना पर्यावरण संवेदनशील क्षेत्र म्हणून घोषित करण्यात आले आहे. यामध्ये रोहा तालुक्यातील तलाठी सजा चिल्हेमधील देवकान्हे, धानकान्हे, चिल्हे व तळवली आदी गावांचा समावेश आहे. येथील ग्रामस्थांनी या निर्णयाविरोधात आक्रमक पवित्रा घेतला आहे. त्‍यामुळे रविवारी ६ जुलै रोजी गावामध्ये बैठकीचे आयोजन करण्यात आले होते. या वेळी शासनाने आमच्या पत्राद्वारे ऐकले नाही, तर प्रसंगी आम्ही पंचकृषीतील ग्रामस्थ तीव्र आंदोलन करू, असा इशारा ग्रामस्‍थांकडून देण्यात आला आहे. पर्यावरण संवेदनशील क्षेत्र नको म्हणून या भागातील ग्रामस्थ रोहा प्रांताधिकारी यांची भेट घेऊन लेखी अर्ज लवकरच देऊन आपली हरकत नोंदविणार आहेत, असा ठराव या बैठकीत घेण्यात आला. याबाबत रायगडचे लोकसभा खासदार सुनील तटकरे, राज्यसभा खासदार धैर्यशील पाटील, मंत्री नामदार आदिती तटकरे व जिल्हाधिकारी किशन जावळे यांच्याकडेदेखील दाद मागणार असल्याचे उपस्थित ग्रामस्थांनी सांगितले.