करवाढीविरोधात हॉटेल व्यावसायिकांचा संताप

करवाढीविरोधात हॉटेल व्यावसायिकांचा संताप
मालकांचा रस्त्यावर उतरून आंदोलनाचा इशारा
जुईनगर, ता. ७ (बातमीदार) : राज्यातील हॉटेल आणि परमिट बार व्यावसायिकांसाठी एकच करप्रणाली असावी, सरकारने करप्रणालीत केलेली अन्यायकारक दरवाढ मागे घ्यावी अन्यथा सर्व हॉटेल्स-परमिट रूम मालक रस्त्यावर उतरून आंदोलन करतील, असा इशारा नवी मुंबई हॉटेल ओनर्स असोसिएशनचे अध्यक्ष दयानंद शेट्टी यांनी दिला. नेरूळ येथे सोमवारी (ता. ७) करवाढीविरोधात हॉटेल व्यावसायिकांची बैठक झाली. यानंतर ते बोलत होते.
दयानंद शेट्टी म्हणाले की, राज्य उत्पादन शुल्क विभाग यांनी महसूलवाढीसाठी किरकोळ विक्री व्यवसायावर अन्यायकारक धोरण राबविले आहे. या धोरणाचा बैठकीत विरोध करण्यात आला. या वेळी व्यासपीठावर नवी मुंबई हॉटेल ओनर्स असोसिएशनचे अध्यक्ष दयानंद शेट्टी, उपाध्यक्ष जयप्रकाश शेट्टी, सरचिटणीस महेश शेट्टी, खजिनदार मोहन गौडा आदी मान्यवर उपस्थित होते.

राज्यातील मद्य उद्योग आर्थिक संकटात आहे. हॉटेल व्यवसायाला उद्योगाचा दर्जा आहे, मात्र हॉटेल उद्योगाला कोणतीही सवलत किंवा व्यवसाय सुलभतेत मदत दिली जात नाही. सर्व प्रकारच्या आर्थिक आव्हानांना तोंड देत हा उद्योग आजही तग धरून आहे. राज्यातील हॉटेल असोसिएशन किंवा मद्य उद्योगातील कोणत्याही घटकास विश्वासात न घेता करप्रणालीत वाढ करण्यात आली असून, त्याचा थेट परिणाम ग्राहक आणि हॉटेल व्यावसायिकांवर होत असल्याचे जयप्रकाश शेट्टी, महेश शेट्टी यांनी सांगितले. या वेळी नवी मुंबई हॉटेल ओनर्स असोसिएशनचे माजी अध्यक्ष रवींद्र शेट्टी, विभागीय उपाध्यक्ष डॉ. शिवा मुडीगेरे, माजी अध्यक्ष शाम एन. शेट्टी आदींसह नवी मुंबई, पनवेलमधील हॉटेल-बार मालक उपस्थित होते.

‘कर तत्काळ रद्द करावा’
वार्षिक उत्पादन शुल्काचा सर्वाधिक परिणाम परमिट रूमधारकांवर असल्याने मूल्यवर्धित कर (व्हॅट) तत्काळ रद्द करावा, सर्वसाधारण जनगणनेनुसार वार्षिक उत्पादन शुल्क, नूतनीकरण शुल्क समायोजित करावे, विक्रीच्या पहिल्या टप्प्यावर उत्पादन शुल्क किमान वाढीसह हॉटेल उद्योगाच्या तक्रारींचे निराकरण करण्यासाठी संबंधित हॉटेलचालक आणि परमिट रूमधारक संघटनांकडून सूचना आणि मार्गदर्शन घेण्यात यावे,
ग्राहकांना दारूविक्रीसाठी हॉटेलचे सीमांकन आणि हॉटेलमध्ये दारू पिण्यासाठी परमिट देणे याबाबतच्या लादण्यात आलेल्या नियम आणि अटी शिथिल कराव्यात, असा ठराव बैठकीत संमत झाल्याची माहिती दिली आहे.