पनवेलमध्ये शाळाबाह्य मुलांसाठी शोधमोहीम

पनवेलमध्ये शाळाबाह्य मुलांची शोधमोहीम
नवीन पनवेल, ता. ७ (बातमीदार) ः पनवेल पालिका क्षेत्रात शाळाबाह्य मुलांची महापालिकेच्या शिक्षण विभागाकडून शोधमोहीम सुरू करण्यात आली आहे. कागदपत्रांअभावी अनेक मुले शिक्षण प्रवाहातून बाहेर पडत आहेत. पनेवलमध्ये असे प्रकार मोठ्या प्रमाणात उघडकीस आल्यानंतर शिक्षण विभागाने शाळाबाह्य मुलांची शोधमोहीम सुरू केली आहे.
शाळाबाह्य, अनियमित व स्थलांतरित मुलांना शिक्षणाच्या प्रवाहात आणण्यासाठी शिक्षण विभागाकडून १ जुलैपासून विशेष शोधमोहीम राबविण्यात येत आहे. ही मोहीम १५ जुलैपर्यंत सुरू असणार आहे. या मोहिमेद्वारे बसस्थानक, रेल्वेस्थानक, बाजारपेठ, दगडखाणी, साखर कारखाने, स्थलांतरित कुटुंबे, बालगृह, निरीक्षणगृह, विशेष दत्तक संस्था आदी ठिकाणी शाळाबाह्य मुलांचे सर्वेक्षण होऊन त्‍यांची नोंदणी करण्यात येणार आहे. विशेषत: तीन ते सहा वर्षे वयोगटातील बालके, एकात्मिक बालविकास योजनेचा लाभ न घेणारी तसेच सहा ते १८ वर्षे वयोगटातील शाळाबाह्य मुलांना या मोहिमेत शोधले जाणार आहे. विद्यार्थ्यांच्या नोंदणीसाठी जन्मदाखला, आधार कार्ड लागते, मात्र स्थलांतरित कुटुंबांकडे अशा प्रकारे संबंधित कागदपत्रे नसल्याने अडचणी येतात. अशा वेळी पालकांचे हमीपत्र घेऊन बोनाफाइड प्रमाणपत्र दिले जाते. त्याआधारे पुढे आधार कार्ड व इतर शासकीय कागदपत्रे काढता येतात. त्यामुळे पालकांनी मुलांना शाळेत पाठवावे, अशा सूचना शिक्षण विभागातर्फे करण्यात आल्या आहेत.