तुर्भ्यातील भीषण आगीत ७ ट्रक, जेसीबी जळून खाक

तुर्भ्यातील भीषण आगीत सात ट्रक, जेसीबी जळून खाक

नवी मुंबई, ता. ७ (वार्ताहर) : तुर्भे सेक्टर २० मधील ट्रक टर्मिनल पार्किंगमधील वाहनांना भीषण आग लागल्याची घटना रविवारी (ता. ६) रात्री अकरा वाजण्याच्या सुमारास घडली. पुठ्ठ्याचे बॉक्स आणि प्लॅस्टिक क्रेट्स साठवलेल्या जागेपासून सुरुवात झालेल्या या आगीने काही क्षणांतच भीषण रूप धारण केले. त्यांनतर ही आग ट्रक पार्किंग परिसरात पसरली. या आगीत कोणतीही जीवितहानी झाली नसली, तरी एकूण सात ट्रक आणि एक जेसीबी वाहन पूर्णत: जळून खाक झाले.
ट्रक टर्मिनल पार्किंगमधील आगीची माहिती मिळताच नवी मुंबई महापालिका अग्निशमन दलाच्या सहा गाड्या आणि एमआयडीसी अग्निशमन दलाच्या दोन गाड्या घटनास्थळी दाखल झाल्या. जवानांनी रात्रभर अथक प्रयत्न करून पहाटेच्या सुमारास येथील आग नियंत्रणात आणली. येथील आग धुमसत असल्याने अग्निशमन दलाकडून सोमवारी (ता. ७) दुपारपर्यंत घटनास्थळी कुलिंगचे काम सुरू होते. खबरदारीचा उपाय म्हणून पार्किंगमधील इतर वाहने तत्काळ सुरक्षितस्थळी हलवण्यात आली. ही आग कशामुळे लागली हे अद्याप स्पष्ट झाले नाही; मात्र पोलिसांकडून आणि अग्निशमन विभागाकडून त्याबाबत तपास सुरू असून आगीच्या कारणांचा शोध घेतला जात आहे. एपीएमसी पोलिस ठाण्यात याबाबतची नोंद करण्यात आली आहे.