ओव्हरहेड वायरच्या संपर्कात आल्याने अल्पवयीन मुलगा गंभीर

ओव्हरहेड वायरच्या संपर्कात आल्याने अल्पवयीन मुलगा गंभीर
रेल्वे गाडीवर चढून रील बनवणे पडले महागात
नवी मुंबई, ता. ७ (वार्ताहर) : रेल्वे गाडीवर चढून रील शूट करणारा १६ वर्षीय आरव श्रीवास्तव हा तरुण ओव्हरहेड वायरच्या संपर्कात आल्याने गंभीर जखमी झाला आहे. सध्या त्याच्यावर ऐरोली येथील बर्न हॉस्पिटलमध्ये उपचार सुरू असून, त्याची स्थिती गंभीर असल्याची माहिती डॉक्टरांनी दिली आहे. ही घटना नेरूळ रेल्वेस्थानकाजवळ रविवारी (ता. ६) दुपारी घडली.

आरव श्रीवास्तव हा बेलापूर येथे राहण्यास असून रविवारी दुपारी नेरूळ रेल्वेस्थानकाजवळ उभ्या असलेल्या कचरा वाहतूक रेल्वेवर चढून रील बनवत होता. यादरम्यान ओव्हरहेड वायरच्या संपर्कात आल्याने त्याला जोरदार झटका बसला. त्यामुळे तो रेल्वे गाडीवरून खाली कोसळला. यामध्ये तो ६० टक्के भाजला असून त्याच्या डोक्याला गंभीर दुखापत झाली. तसेच, चेहऱ्याच्या हाडांमध्येही फ्रॅक्चर झाले. जखमी आरवला तत्काळ नेरूळ येथील रुग्णालयात दाखल करण्यात आले तेथून त्याला पुढील उपचारासाठी ऐरोली येथील बर्न हॉस्पिटलमध्ये हलविण्यात आले आहे. डॉक्टरांनी दिलेल्या माहितीनुसार, सध्या आरववर निरीक्षणाखाली उपचार सुरू आहेत. त्याची स्थिती गंभीर असली तरी सध्या तो स्थिर आहे. लवकरच त्याच्यावर शस्त्रक्रिया करण्यात येणार असल्याचे डॉक्टरांनी सांगितले. वाशी रेल्वे पोलिसांनी या घटनेची नोंद घेतली आहे.

तज्ज्ञांचे आवाहन
तरुणांनी सोशल मीडियाच्या आहारी जाऊन जीवघेणे कृत्य करू नये. पालकांनीही आपल्या मुलांचे सोशल मीडिया वापरावर लक्ष ठेवणे अत्यंत आवश्यक आहे, असे आवाहन मानसोपचारतज्ज्ञांनी केले आहे. सोशल मीडियावर चुकीच्या पद्धतीने व्हिडिओ तयार करणाऱ्यांवरही लक्ष ठेवण्याची गरज असल्याचे तज्ज्ञांनी सांगितले.