आरोग्य योजनांमुळे वारकऱ्याला जीवदान

आरोग्य योजनांमुळे
वारकऱ्याला जीवदान
सकाळ वृत्तसेवा
मुंबई, ता. ७ : आषाढी वारीसाठी नांदेडहून आलेले वारकरी बालाजी संगेकर यांना अचानक हृदयविकाराचा तीव्र झटका आला. वारीदरम्यान प्रकृती खालावल्याने तातडीने त्यांना पंढरपूर येथील डॉ. काणे रुग्णालयात दाखल करण्यात आले. वैद्यकीय तपासणीनंतर त्यांना तातडीने अँजिओप्लास्टी करण्याचा निर्णय डॉक्टरांनी घेतला. या उपचारांचा खर्च खूप मोठा होता; पण आयुष्मान भारत पंतप्रधान जनआरोग्य योजना व महात्मा जोतीराव फुले जनआरोग्य योजना यांच्या एकत्रित लाभातून संपूर्ण उपचार मोफत करण्यात आले. यामुळे वेळेवर उपचार मिळून त्यांचे प्राण वाचले. राज्य सरकारने या दोन्ही योजना एकत्रित राबवल्या आहेत. या योजनेतून सूचिबद्ध शासकीय व खासगी रुग्णालयांत पाच लाखांपर्यंत मोफत उपचार मिळतो. या योजनेमुळे १,३५६ आजारांवर उपचार करण्यात येतात. राज्यभरातील दोन हजारांहून अधिक रुग्णालये या योजनेंतर्गत सूचिबद्ध आहेत.