हार्बरवर गोंधळाचा प्रवास…

‘हार्बर’वर गोंधळाचा प्रवास
वाशी-पनवेल लोकल सेवा १३ तासांनी पूर्ववत
सकाळ वृत्तसेवा
मुंबई, ता. ७ : हार्बर मार्गावरील वाशी-पनवेल लोकल सेवा तब्बल १३ तासांच्या खंडानंतर सोमवारी (ता. ७) पहाटे पूर्ववत सुरू झाली. ब्लॉक कालावधीनंतर सीवूड्‍स-दारावे ते नेरूळ स्थानाकादरम्यान रविवारी दुपारी साडेचारच्या सुमारास ‘टीआरटी’ मशीनचे एक चाक रुळावरून घसरल्यानंतर या मार्गावरील वाहतूक पूर्णपणे विस्कळित झाली. त्यानंतरच्या गोंधळानंतर दुसऱ्या दिवशीही आठवड्याच्या पहिल्याच दिवशी सकाळी कामावर निघालेल्या चाकरमान्यांना मोठा मनस्ताप सहन करावा लागला.

रेल्वे प्रशासनाने रविवारी दुपारी वाशी-पनवेल यादरम्यान देखभाल व दुरुस्तीसाठी ब्लॉक घेतला होता. नियोजनाप्रमाणे ब्लॉक ४ वाजता संपला, मात्र लगेचच ब्लॉक कालावधीनंतर सीवूड्‍स-दारावे ते नेरूळ स्थानाकादरम्यान ‘टीआरटी’ ट्रेनचे चाक रुळावरून घसरले. त्यामुळे या मार्गावरील वाहतूक पूर्ण ठप्प झाली. घटनास्थळी तांत्रिक पथक तातडीने दाखल झाले. त्यानंतर सोमवारी पहाटे ६ वाजता घसरलेले चाक रुळावर आणण्यात यश आले आणि वाशी-बेलापूर लोकल सेवा पुन्हा सुरू झाली, मात्र दरम्यानच्या काळात सर्वच स्थानकांवर प्रवाशांची प्रचंड गर्दी झाली. सकाळच्या ‘पीक अवर्स’मध्ये गाड्या १५ ते २० मिनिटांच्या उशिराने धावत होत्या. त्यामुळे सीएसएमटीकडे जाणाऱ्या प्रवाशांची त्रेधातिरपीट उडाली.

रेल्वेचे ढिसाळ नियोजन!
लोकल सेवा ठप्प झाल्याने पर्यायी वाहतूक व्यवस्थेवर ताण आला. प्रवाशांची बसस्थानकांवर गर्दी उसळली, रिक्षा-टॅक्सी थांब्यांवर लांबच लांब रांगा लागल्या. अनेकांना मासिक पास असूनही अतिरिक्त खर्च करत प्रवास करावा लागला. त्यामुळे प्रवाशांना आर्थिक भुर्दंडही सहन करावा लागला. ब्लॉक संपल्यानंतर वाहतूक तत्काळ सुरू होईल, असा प्रशासनाचा दावा फोल ठरला. दुर्घटना टाळण्याचे उपाय आणि तत्काळ सेवा सुरळीत करण्याचे नियोजनच नसल्याचा आरोप प्रवाशांकडून करण्यात येत आहे. ‘रेल्वेच्या ढिसाळ नियोजनामुळेच आमच्यावर ही वेळ आली’, अशी प्रतिक्रिया संतप्त प्रवाशांनी दिली.