शाळेतील आठवणींनी सरन्यायाधीश भारावले

शाळेतील आठवणींनी सरन्यायाधीश भारावले
शिरोळकर हायस्कूलला भूषण गवई यांची भेट
प्रभादेवी, ता. १० (बातमीदार) : गिरगावातील चिकित्सक समूहाच्या शिरोळकर शाळेला भेट देत सरन्यायाधीश भूषण गवई यांनी ५० वर्षांपूर्वीच्या आठवणींना उजाळा दिला. ज्या शाळेमुळे संस्कार घडले, आपले चारित्र्य कसे घडवावे याचे बाळकडू दिले, ज्या शिक्षकांनी मला घडविले त्या शाळेला वंदन करण्याचे भाग्य मला आज लाभले, अशी भावना सरन्यायाधीशांनी या वेळी व्यक्त केली.
चिकित्सक समूहाच्या शिरोळकर हायस्कूलमध्ये शालेय शिक्षण घेतलेल्या भारताच्या सर्वोच्च न्यायालयाचे सरन्यायाधीश भूषण गवई यांनी रविवारी (ता. ६) शाळेला भेट दिली आणि पुन्हा एकदा शालेय जीवनातील क्षण अनुभवले. या वेळी शाळेतील एनसीसी कॅडेट्सच्या विद्यार्थ्यांनी बँड पथकासह सलामी देत त्यांचे स्वागत केले. शाळेच्या वतीने त्यांना चांदीची समई आणि त्यांचा शाळा सोडल्याचा दाखल भेट म्हणून दिला. या वेळी पालकमंत्री मंगलप्रभात लोढा, चिकित्सक समूहाचे अध्यक्ष किशोर रांगणेकर, सचिव डॉ. गुरुनाथ पंडित, मुख्याध्यापिका संचिता गावडे, विनायक जोशी, सतीश सराफ आदी उपस्थित होते.
सरन्यायाधीश या पदावर असतानाच मला शाळेत येण्याची इच्छा होती आणि ती संधी मला मिळाली, ही बाब मी भाग्याची मानतो, असेही त्यांनी सांगितले. शाळेत असताना मी वक्तृत्व आणि वादविवाद स्पर्धेत नेहमी सहभाग घ्यायचो. त्यामुळे माझी कारकीर्ददेखील या क्षेत्रातच झाली, अशी आठवण त्यांनी सांगितली.

माझे शिक्षण मराठीतून
त्या वेळी मराठीतील ही नावाजलेली शाळा होती. माझे शिक्षण मराठीत झाले. मराठीतून शिक्षण घेतल्याने संस्कार उत्तम होतात आणि म्हणून आपल्या सर्वांना आपल्या मातृभाषेबद्दल अभिमान हवा, असे गवई यांनी सांगितले.

५० वर्षांपूर्वीच्या आठवणींना उजाळा
आम्हाला त्या काळी २० पैसे पॉकेट मनी मिळायचे, तेव्हा पाच पैशांना पट्टी समोसा आणि १० पैशांत मिसळ-पाव मिळायचा. त्यात खूप आनंद वाटायचा.