फुकट्या प्रवाशांना रेल्वेचा दणका

सकाळ वृत्तसेवा
मुंबई, ता. ७ : तिकीट नसलेल्या तसेच अनियमित प्रवास करणाऱ्या प्रवाशांकडून पश्चिम रेल्वेने एप्रिल ते जून या तीन महिन्यांच्या कालावधीतच तब्बल ५८ कोटी ७९ लाखांचा दंड वसूल केला आहे. गेल्या वर्षी याच कालावधीच्या तुलनेत ही रक्कम १३ टक्क्यांनी अधिक आहे.
मुंबई उपनगरीय विभागातच या कालावधीत १५ कोटी ९० लाखांचा दंड वसूल करण्यात आला. या विभागात लोकल ट्रेन, मेल/एक्स्प्रेस आणि सुट्टीच्या विशेष गाड्यांमध्ये विशेष मोहीम राबवण्यात आल्या होत्या. जूनमध्येच तिकीट नसलेल्या आणि अनियमित प्रवास करणाऱ्या २.४२ लाख प्रवाशांवर कारवाई करण्यात आली. या वेळी जवळपास १५.२४ कोटींचा दंड वसूल करण्यात आला आहे. या आकडेवारीत बुक एसी लोकलमध्ये अनधिकृत प्रवेश करणाऱ्या प्रवाशांचादेखील समावेश आहे.
---------------------------------
तिकीटधारकांना दिलासा
एप्रिल ते जून या कालावधीत १८,७५० अनधिकृत प्रवाशांवर दंडात्मक कारवाई करीत ६३ लाखांची वसुली करण्यात आली. ही रक्कम गेल्या वर्षीच्या तुलनेत ४४ टक्क्यांनी अधिक आहे. तसेच रेल्वेच्या उद्दिष्टापेक्षा ११ टक्के अधिक आहे. या मोहिमेमुळे तिकीटधारकांना दिलासा मिळाला आहे.