पोलिस आयुक्तालयाला गळती

सकाळ वृत्तसेवा
ठाणे, ता. ७ : ठाणे शहर पोलिस आयुक्तालयाच्या इमारतीला गळती लागल्याचा प्रकार समोर आला आहे. चौथ्या मजल्यावरील स्लॅबला गळती लागल्याने पाणी ठिबकत आहे. या गळतीमुळे मजलीवरील उद्‍वाहकासमोर पाणीच पाणी दिसत आहे. हे पाणी जसे साचते तसे वारंवार पुसून काढावे लागत आहे.
कळवा खाडीजवळील ठाणे शहर पोलिस आयुक्तालयाची चार मजली ही इमारत ११ वर्षे जुनी आहे. इमारतीच्या टेरेसवर पूर्ण पत्रे टाकण्यात आलेले नाही. तसेच, या इमारतीच्या पहिल्या मजल्यावर शहर पोलिस आयुक्त, पोलिस सहआयुक्त, अतिरिक्त पोलिस आयुक्तांची कार्यालये आहेत. तर दुसऱ्या आणि तिसऱ्या मजल्यावर पोलिस उपायुक्त, तसेच सहाय्यक पोलिस आयुक्तांची कार्यालये आहेत. तळ मजल्यावर नियंत्रण विभाग आहेत. चौथ्या मजल्यावर पत्रकार परिषद सभागृह आणि विशेष शाखा उपायुक्त आदी विभागांची कार्यालये आहेत. ठाणे शहर पोलिस आयुक्तालयाच्या हद्दीत लावण्यात येणाऱ्या सीसीटीव्ही कॅमेरा सर्व्हर आणि नियंत्रण कक्ष तयार करण्यात आला आहे. दररोज नागरिकांची वर्दळ आयुक्तालय इमारतीत पोलिस अधिकाऱ्यांना भेटण्यासोबतच काही कामानिमित्त सुरू असते. अशा वेळी चौथ्या मजल्यावर गळती सुरू झाली आहे. या पाण्यामुळे कोणी घसरून पडू नये, यासाठी सफाई कर्मचारी वारंवार फरशी पुसत आहेत.
दरम्यान, ही चार मजली इमारतीची गळती आताची नसून ती जुनीच आहे. ही गळती थांबविण्यासाठी टेरेसवर रसायने टाकण्याचे काम ठाणे जिल्हा परिषदेच्या सार्वजनिक बांधकाम विभागामार्फत करण्यात आले होते. मात्र, तरी सुद्धा यंदा गळती सुरू झाल्याचे सूत्रांनी सांगितले. या संदर्भात पोलिस आयुक्त आशुतोष डुंबरे यांच्याशी संपर्क साधण्याचा प्रयत्न केला असता, तो होऊ शकला नाही.

अशी झाली अदलाबदल
ठाणे शहर पोलिस आयुक्तालयाची इमारती ही सार्वजनिक बांधकाम विभागाने ग्रामीण पोलिस अधीक्षक कार्यालयासाठी उभारली होती. शहर पोलिस आयुक्तालयाला जागा कमी पडू लागल्याने इमारतींची अदलाबदल करण्यात आली. तेव्हापासून कळवा खाडीजवळील इमारत ठाणे शहर पोलिस आयुक्तालय म्हणून ओळखली जाऊ लागली. शासकीय विश्रामगृहाच्या शेजारी जुनी पोलिस आयुक्तालयाची इमारत पोलिस अधीक्षक कार्यालय म्हणून ओळखली जात आहे.

पोलिस आयुक्तालयातील गळती संबंधित तत्काळ पाहणी केली जाईल. तसेच त्या गळतीवर तातडीने उपाययोजनाही करण्यात येतील.
- सचिन पाटील, कार्यकारी अभियान, सार्वजनिक बांधकाम विभाग ठाणे