तरणतलाव मृत्यू प्रकरणात अधिकार्‍याची विभागीय चौकशी

तरणतलाव मृत्यू प्रकरणात अधिकाऱ्याची विभागीय चौकशी

भाईंदर, ता. ७ (बातमीदार) : मिरा-भाईंदर महापालिकेच्या क्रीडा संकुलातील तरणतलावात एप्रिलमध्ये एका ११ वर्षीय मुलाचा बुडून मृत्यू झाला होता. या प्रकरणात एका पालिका अधिकाऱ्याची विभागीय चौकशी सुरू करण्यात आली आहे; मात्र हा अधिकारी कोण, याबाबत मात्र प्रशासनाकडून कमालीची गुप्तता बाळगली जात आहे.

भाईंदर पूर्व भागात महापालिकेचे लोकनेते गोपीनाथ मुंडे क्रीडा संकुल आहे. हे संकुल चालविण्यासाठी कंत्राटदाराची नियुक्ती केली आहे. या क्रीडा संकुलात उन्हाळी शिबिरात प्रशिक्षणादरम्यान २० एप्रिलला ग्रंथ मुथा या अकरावर्षीय मुलाचा तरणतलावात बुडून मृत्यू झाला. पोलिसांनी याप्रकरणी सुरुवातीला अपघाती मृत्यूची नोंद केली होती; मात्र त्यानंतर पोलिसांनी क्रीडा संकुलाचा कंत्राटदार साहस चॅरिटेबल ट्रस्ट, क्रीडा संकुलाचा व्यवस्थापक, प्रशिक्षक अशा सहा जणांवर गुन्हा दाखल केला. त्यानंतर चौकशीसाठी महापालिका आयुक्त राधाबिनोद शर्मा यांनी अतिरिक्त आयुक्तांच्या अध्यक्षतेखाली एक समिती गठित केली होती. या समितीने आपला अहवाल आयुक्तांना सादर केला. या अहवालाच्या आधारे आता क्रीडा संकुलाशी संबंधित एका अधिकाऱ्याची विभागीय चौकशी सुरू करण्यात आल्याची माहिती उपायुक्त कल्पिता पिंपळे यांनी दिली; मात्र हा अधिकारी नेमका कोण, याबाबत प्रशासनाकडून मौन बाळगण्यात येत आहे.